Tarazda qurylys bóliminiń basshysy 4 jylǵa sottaldy

ASTANA. KAZINFORM –Taraz qalasynyń soty qalalyq qurylys bóliminiń basshysy N.Qaldybaevty, sondaı-aq merdigerlik uıymdarynyń ókili O.Erbolatulyn sottady. Sybaılas jemqorlyqqa qarsy is-qımyl agenttigi málimdedi.

Erbolatuly halyqtyń áleýmettik osal toptary úshin kóppáterli turǵyn úılerdiń qurylysyna bólingen bıýdjet qarajatyn jymqyrǵany úshin kináli dep tanyldy, al Qaldybaev merdigerlerdiń múddesi úshin oryndalǵan jumystardyń jalǵan aktilerine qol qoıyp, aqsha aýdarǵan.

Olardyń qylmystyq qyzmetiniń nátıjesinde memleketke 519 mln teńgeden astam shyǵyn keltirildi. Sot úkimimen Qaldybaevqa 4 jyl, Erbolatulyna 6 jyl bas bostandyǵynan aıyrý jazasy taǵaıyndaldy.

Budan basqa, sottalǵan Qaldybaev memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıy aıyryldy, al Erbolatulyna memlekettik, jeke uıymdarda jáne kvazımemlekettik sektor sýbektilerinde 10 jyl merzimge qarjy bólýge baılanysty laýazymdardy atqarýǵa tyıym salyndy.

Sot aktisi zańdy kúshine engen joq.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

Buǵan deıin Jetisý oblysynda Tabıǵı monopolııalardy retteý departamentiniń basshysy sottalǵanyn jazǵan bolatynbyz.