Taraz kafesinde shoshqa eti dep ıttiń etin usynǵan

TARAZ. QazAqparat - Tarazdaǵy kafe as ishýge kelgen tutynýshylaryna shoshqa eti dep, ıttiń etinen as usynǵan, dep habarlaıdy QazAqparat tilshisi.

Taraz qalasy Qolbasshy Qoıgeldi kóshesi № 283 mekenjaıda ornalasqan «Antrekot» kafesiniń buqtyrylǵan shoshqa qabyrǵalarynan synama alǵan oblystyq sanıtarlyq-epıdemıologııalyq baqylaý departamentiniń mamandary astyń ıttiń etinen daıyndalǵanyn anyqtaǵan.

Depýtat Sergeı Snıgırevtiń aıtýynsha, jospardan tys tekserý nátıjeleri boıynsha anyqtalǵan ákimshilik quqyq buzýshylyqtar týraly hattamalar jasalyp, kafe egesine aıyppul salynyp, kemshilikti joıý týraly sanıtarlyq nusqama berilgen. Sondaı-aq, Taraz qalalyq polıtsııa basqarmasyna hattar jiberilgen.

Atalǵan oqıǵadan soń «Zarıa», «Sýshı lav», «DIRD» kafeleri de sanıtarlyq-epıdemıologııalyq baqylaý departamenti mamandarymen tekserilip, olar janýarlardyń DNQ-syna daıyn ónim men shıkizattyń 20 synamasyn aldy.

Aıta keteıik, buǵan deıin Tarazda esirtki óndiretin fıtolaboratorııa anyqtalǵanyn habarlaǵan bolatynbyz. Kúdikti retinde Reseı Federatsııasynyń 61 jastaǵy azamatynyń turǵylyqty mekenjaıyna tintý sharalary júrgizilgen.

Tekserý barysynda baqshada kólik shınasynan 4 kannabıs butasy tabylady. Sondaı-aq, qyzmetkerler fıtolaboratorııaǵa aınaldyrylǵan monshany anyqtaıdy. Onda 2 kannabıs butasy tabylǵan. Munymen qosa, úıdiń ár jerinen keptirilgen marıhýana esirtki zattary tabylady.