Taraz irgesindegi saıajaı turǵyndary jaryqsyz otyr
«Leto» saıajaı alqabynyń tóraǵasy transformatordyń shamasy jetpeıdi dep, 60 úıdi elektr qýatynan ajyratqan. Kúnniń aptap ystyǵynda azyq-túlikteri buzylyp, órkenıetten tys qalǵan turǵyndar shaǵymdaryn jetkizdi.
Osylaısha qynjylǵan 4 balanyń anasy Ardaq Dáýkenova azyq-túliktiń barlyǵyn qoqysqa tastadyq deıdi. Qýat kózinen qaǵylǵan olar kesh batsa boldy, otbasymen jalǵyz syǵyraıǵan balaýyz shamdy jaǵalap, kúneltýge májbúr.
«Qalaǵa tıip turmyz. Al endi mynaý joldyń arǵy jaǵynda «Leto» degen massıv bar. Olar bizdiń qoldanyp otyrǵan jaryǵymyzdy ýaqytsha berdi. Endi qıyp tastady da, ne qaladan ala almaımyz jaryqty, ne olardan ala almaımyz», - deıdi «Baqshashy» tutyný kooperatıviniń turǵyny Egizbaı Aıhanov.
«Baqshashy» kooperatıvi kórshi «Leto» saıajaıynan elektr qýatyn alyp, aqshasyn da ýaqtyly tólep kelgen. Alaıda, saıajaı basshysy Alekseı Manakovtyń aıtýynsha, «baqshashylyqtar» ózderine jeke shaǵyn elektr stansasyn ornatýy kerek. Óıtkeni, turǵyndar sany kóbeıgen saıajaıdy jaryqtandyrýǵa elektr transformatorynyń qaýqary jetpeıdi dep otyr. «Mende 400 otbasy turady, olardy elektrmen qamtamasyz etýge toq kózderiniń shamasy jetpeıdi. Tipti kirjýǵysh máshınesin tartpaıdy. Basynda ol jer qosylǵanda nebári 3 úı bolǵan, qazir 60-qa jýyqtady», - deıdi «Leto» tutyný kooperatıviniń tóraǵasy Alekseı Manakov.
Qalalyq TÚKSh, jolaýshylar kóligi jáne avtomobıl joldary bólimi basshysynyń orynbasary Qadyrbek Demetbaevtyń aıtýynsha, bul kisilerdiń ózderi osy saıajaıǵa bólek transformator stansasyn alýy kerek bolatyn.
«Osy saıajaıda jeke kásipker ózine avtomobıl jóndeıtin tseh ashqan. Sol jerde óziniń úlken kúshti qýaty bar transformator qoıǵan. Ol kisimen biz kelisip, kelistirip, halyqtyń sol jerden elektr qýatyn ala turýǵa tolyq múmkinshiligi bar» deıdi ol.
Baqshashy aýyly turǵyndarynyń máselesin sheshý úshin eń arzany 1 mln teńge turatyn transformator qajet. Alaıda 60 úıli qarasha halyqtyń bul qarajatty jınaýǵa qaltasy kótermeı otyr.
«Aqsha jınaýǵa bulardyń shamasy joq, balalardyń árqaısysyna qazir 40-50 myńnan aqsha, kıim alý kerek. Ózderi egin basynan zorǵa taýyp júr nanyn. Biz qaladan svet alýymyz kerek bop tur. Balalarymyz oqýshy, erteń eki jetiden keıin oqý bastalady. Balalarymyzdy qalaı jiberemiz?», - deıdi «Baqshashy» tutyný kooperatıviniń turǵyny Kúnqııash Qalıeva.
Saıajaı halqynyń basty talaby - elektr jaryǵyn el qatarly tikeleı qaladan tartyp, ıaǵnı, elektr taratýshy kompanııaǵa qaratyp, solarǵa tólem jasaý. Alaıda bul armandarynyń oryndalýyna bir-eki jyldaı ýaqyt qajet. Óıtkeni úlken transformator ornatý 2019 jylǵa josparlanyp otyr.
