«Taraz» fýtbol klýbynyń ańyzǵa aınalǵan quramy taǵy da alańǵa shyqty
TARAZ. QazAqparat - Tarazdyń ortalyq stadıonynda fýtbol jankúıerleri bir kezderi elge eńbegi sińgen bapker Vaıd Talǵaevtyń qolastynda óner kórsetken teńbil dop sheberleriniń ónerin tamashalaý múmkindigine ıe boldy, dep habarlaıdy QazAqparat tilshisi «Taraz» fýtbol klýbynyń baspasóz qyzmetine silteme jasap.
Dál osy komanda 90-jyldary qazaq fýtbolynyń bıigine kóterilip, úsh jyl qatarynan júldeli oryndardan kóringen, 1996 jyly el chempıony atanǵan bolatyn.
Sol dańqty ujymnyń ózegin quraǵan Erlan Eleýsinov, Nurken Mázbaev, Azamat Nııazymbetov, Sergeı Tagıev, Nurmat Myrzabaev, Farhad Mirsálimbaev syndy fýtbolshylar ustazy Vaıd Talǵaevtyń 65 jasqa tolyna oraı «Taraz» ardagerleri komandasy sapynda taǵy da alańǵa shyqty.
Komandanyń qataryn «Taraz» klýbynyń qazirgi basshysy Qanat Musataev, qaqpashylar bapkeri Mıroslav Radovanovıch, komanda ardagerleri Asqar Kúshikbaev, Samat Derbisbaev, Bekmurat Haıtmuratov, Ábdirasil Anarmetov, Georgıı Mardenov, Súıin Moldashbaev, Altaı Álimbekovter tolyqtyrdy.
«Taraz ardagerlerine» qarsy Qazaqstan fýtbol federatsııasynyń qurmetti prezıdenti Seıildá Baıshaqov bastaǵan Jambyl oblysy ardagerleriniń quramasy oınady.
Oıyn qyzyqty sátterge toly boldy. Teńbil dop sheberleri jastyq shaqtaǵy daǵdy men sheberlikterin áli kúnge saqtap kele jatqanyn kórsetti.
Ańyz komandanyń úsh golyna jambyldyq ardagerleri bir golmen jaýap berdi.
