«Taraz» fýtbol klýbynyń 60 jyldyq mereıtoıy atap ótildi
TARAZ. QazAqparat – Ótken demalys kúni Tarazda eki mereıtoı atalyp ótildi. Onyń biri aty ańyzǵa aınalǵan fýtbolshy, «Qaırat» jáne KSRO quramasynda oınaǵan Seıilda Baıshaqovtyń 70 jasqa tolýy bolsa, ekinshisi «Taraz» fýtbol komandasynyń qurylǵanyna bıyl 60 jyl tolýy, dep habarlaıdy QazAqparat tilshisi.
Mereıtoı ıelerin oblys ákimi Berdibek Saparbaev arnaıy baryp quttyqtap, merekelik syı-syıapat jasady.
Aımaq basshysy sportshylardy quttyqtaı otyryp, Tarazdyń fýtbol mektebi Seıilda Baıshaqov bastaǵan jarqyn jáne talantty aıaqdop sheberlerin elimizge syılaǵanyn atap ótti.
«Seıilda Baıshaqovtyń SSSR fýtbol quramasynda oınaýy tegin emes. Ol ózin soǵan laıyq ekenin dáleldedi. Biz sol jyldary teledıdar aldyna jaıǵasyp, uly aıaqdop sheberleriniń oıynyń úzbeı tamashalaıtynbyz. Qazirgi Qazaqstan quramyndaǵy beldi fýtbolshylardyń birazy Taraz mektebinen shyqqany qýantady. Bul qatarda Baýyrjan Islamhan, Bahtıer Zaınýtdınov, Erkebulan Seıdahmet bar. Olar búginde sheteldik fýtbol klýbtarynda da el mereıin tasytyp júr», - dep atap ótti B.Saparbaev.
Óńir basshysy Seıilda Baıshaqovqa sándi shapan jaýyp, bórik syılady. Al «Taraz» fýtbol klýbyna 5 mıllıon teńgeniń sertıfıkaty tabystaldy.
Saltanatty sharadan keıin ár jyldary «SSSR» jáne iri fýtbol klýbtarynda óner kórsetken «Taraz» jáne «Qaırat» quramalarynyń ardagerleri jasyl alańǵa shyqty. Olardyń qatarynda «Taraz» fýtbol komandasynyń qazirgi jattyqtyrýshysy Vladımır Nıkıtenko, jastar quramasynyń burynǵy bas bapkeri Sergeı Tagıev, ardagerler arasyndaǵy el jáne Azııa chempıony Aleksandr Mazmanıan, «Qaırat» quramasynyń eki dúrkin chempıony Qaırat Aımenov, «Tarazdyń» úzdik bombardırleri Anatolıı Belskıı, Nurmat Myrzabaev, Erlan Eleýsinov, Asqar Kúshekbaev ta bar. Vaıt Talgaev pen Vıktor Katkov jattyqtyrýshy mıssııasyn oryndady.
Berdibek Saparbaev pen Seıilda Baıshaqov ala dopty oıynǵa qosyp berdi. Tartysty kezdesýdiń alǵashqy kezeńinde ardagerler áli de shıraq ekendikterin baıqatyp, birneshe ótkir shabýyldar uıymdastyra aldy. «Taraz» jáne «Qaırat» ardagerler arasyndaǵy joldastyq kezdesý 5:5 esebimen aıaqtaldy.
Joldastyq kezdesýden keıin Seıilda Baıshaqov is-sharany uıymdastyrǵan oblys ákimdigine jáne «Taraz» fýtbol komandasyna alǵysyn bildirdi.
«Osy sharanyń arqasynda biz qaıta basymyz qosylyp, ótkendi eske aldyq. Ókinishke oraı, bizben birge oınaǵandar qazir aramyzda joq keıbir komandalas