«Taraz» FK oıynshylardyń jalaqysyna qatysty aqparatqa jaýap berdi
ASTANA. KAZINFORM — «Taraz» fýtbol klýby áleýmettik jelilerde oıynshylardyń jalaqysy men klýbtyń qarjylyq mindettemeleri týraly taraǵan jarııalanymdarǵa baılanysty túsinikteme berdi.
Klýbtyń baspasóz qyzmetiniń málimetinshe, kelisimsharttardyń jekelegen úzindileri naqty tólemder men qarjylandyrý kózderi týraly tolyq aqparat bermeıdi. Sondyqtan klýbtyń qarjylyq mindettemelerin baǵalaý kezinde bıýdjet qarajaty men demeýshilik qarjyny ajyratyp, tekserilgen derekterge súıený qajet.
Osyǵan baılanysty klýb BAQ ókilderi men áleýmettik jelidegi aqparattyq paraqshalardyń ákimshilerin jarııalanatyn málimetterdiń durystyǵyn tekserýge, derbes derekter men qupııa aqparatty qorǵaý talaptaryn saqtaýǵa shaqyrdy. Sondaı-aq qosymsha túsinikteme alý úshin klýbqa júginýge keńes berdi.
«Taraz» FK ókilderi klýbtyń iskerlik bedeline nuqsan keltiretin jalǵan aqparat taratylǵan nemese qupııa málimetter zańsyz jarııalanǵan jaǵdaıda, óz quqyqtary men zańdy múddelerin qorǵaý úshin zań aıasynda sharalar qabyldanatynyn eskertti.
Buǵan deıin Azız Anarmetov maýsym sońyna deıin «Taraz» fýtbol klýbynyń bas bapkeri bolatynyn jazǵanbyz.
