«Taraz» fılmin túsirýdi 5 ret toqtatpaq boldym - Nurtas Adambaı
ALMATY. QazAqparat - Prodıýser, akter, shoýmen Nurtas Adambaı «Taraz» fılmin túsirý barysyndaǵy qıyndyqtarymen bólisti.
«Shynyn aıtqanda, «Taraz» fılmin túsirýge daıyndyq barysynda jobany toqtatýǵa 5 ret árekettendim. Komedııa túsirgennen drama shyǵarý aıtarlyqtaı qıyn eken. Men, bul joba «Sabına kelin» fılmindeı nátıjeli bolýy úshin úlken táýekelge barý qajettigin tereń oıladym. Sóıte tura, kirisip kettik», - dep jazdy ol Instagram áleýmettik jelisindegi jeke paraqshasynda.
Prodıýserdiń aıtýynsha, túsirilim barysynda ol buǵan deıin kınomen shuǵyldanyp kórmegendeı sezimde bolǵanyn aıtty.
«Jańalyq kóp boldy. Qarjy shyǵyny kúnnen kúnge ósip bara jatqanyn kórip otyrdym. Bizdiń fılm bıýdjetine sel quıylǵandaı boldy, biraq sheginýge bolmaıtyn edi... Túsirilim toby men akterlerdiń yntasyn kórip, men, fılm qalaıda túsirilýi kerek ekenin uqtym. Osydan keıin post-pradkshn ýaqyty saryltty, montaj, túsin óńdeý, áýen, dybys... Kóp kúsh, kóp qarjy (biz úshin bul orasan zor aqsha) jumsaldy. Biraq, «Tarazǵa» janyn salǵan toptyń jumylǵan judyryqtaı bolǵanyn atap aıtýǵa bolady. Maǵan aqsha úshin emes, adamdardyń ıdeıa úshin birikkenin kórý qýanysh boldy», - deıdi N.Adambaı.
Rejısser «Taraz» fılmi Los-Andjelestegi festıvalde 2-shi júldeli orynǵa qol jetkizgenin estigende, eńbektiń zaıa ketpegenin túsingenin aıtady.
«Endi óz kórermenimiz bizdiń eńbekti baǵalaıdy dep úmittenemin. Dostar, kınoǵa kelińizder. Biz sizder úshin eńbek ettik», - dep sózin túıindedi shoýmen.
Eske sala keteıik, Nurtas Adambaıdyń «Taraz» fılmi onyń drama janryndaǵy alǵashqy kıno kartınasy. Atalǵan fılm AQSh-taǵy «Genre Celebration Film Festival» baıqaýynda birden eki nomınatsııa boıynsha syılyqqa ıe boldy.
