Taraz dámhanasyndaǵy iri órt: jalyn turǵyn úıge aýysty
TARAZ. QazAqparat - Tarazda «Shah» dámhanasynan tutanǵan órttiń shyǵý sebepteri anyqtalýda, dep habarlaıdy «QazAqparat» HAA tilshisi. Kóńil kóteretin mekemeler tyǵyz ornalasqan Kósheneı kóshesindegi bul dámhanada tarazdyqtardyń qarasy qashan da kóp bolatyn.
Jambyl oblystyq TJD basshysy Baǵdat Danılov «QazAqparat» HAA tilshisine bergen suhbatynda málim etkendeı, órt jaıynda habar saǵat 10.12-de kelip túsken, jalyn 10.50-de aýyzdyqtalyp, 11.33-te tolyǵymen sóndirilgen. «Dámhana ǵımaraty tolyǵymen janyp ketti. Órttiń jalpy aýmaǵy 1 200 sharshy metrden astamdy qurady. Onymen qosa, ot jaqyn ornalasqan turǵyn úı men sharýashylyq nysandarǵa aýysqan. Turǵyn úıdiń shatyry búlingen», - deıdi Baǵdat Danılov.
Tótenshe jaǵdaılar departamentinen habarlanǵandaı, tilsiz jaýdan zardap shekkender joq.
