Taraz ben Shymkentte 2 balldyq jer silkinisi sezildi

ASTANA. KAZINFORM – TJM «Seısmologııalyq zertteý ınstıtýty» JShS seısmıkalyq stantsııalar jelisinde 6 jeltoqsan kúni Astana ýaqytymen 2 saǵat 04 mınýtta jer silkinisi tirkeldi.

Jer silkinisiniń oshaǵy Ózbekstan aýmaǵynda, Almaty qalasynan ońtústik-batysqa qaraı 565 shaqyrym qashyqtyqta ornalasqan.

Dúmpý Taraz jáne Shymkent qalalarynda 2 ball shamasynda sezilgen.

Zardap shekkender men qıraýlar týraly málimet túsken joq.

TJM turǵyndarǵa jer silkinisi kezindegi qaýipsizdikke baǵyttalǵan myna 10 qarapaıym qadamdy este saqtaýdy eskertedi:

• Jer dúmpýi kezinde úreılenbeńiz;
• Jer silkiný kezinde lıft pen baspaldaqty qoldanbańyz;
• Jıhazdan, terezeden qashyq turyńyz;
• Jasyrynatyn jerdi tabyńyz, joǵarǵy qabattarda negizgi irgeli qabyrǵalardyń buryshynan oryn alyp jasyrynyńyz;
• Ǵımarattan shyǵyńyz (tómengi qabattarda), kóp qabatty úılerde jer silkinisi aıaqtalǵan soń ǵımarattan shyǵyńyz;
• Keter aldynda sýdy, gazdy, elektr qýatyn múmkindigińizshe óshirińiz;
• Dabyl jol sómkesin alyńyz (aldyn ala daıyndap qoıý qajet);
• Elektr jelilerinen, ǵımarattardan, aǵashtardan aýlaq bolyńyz;
• Jer silkinýine daıyn bolyńyz;
• Qart adamdarǵa, balalarǵa, múmkindigi shekteýli adamdarǵa kómek kórsetińiz.

Aıta keteıik, jaqynda ǵana Almatyda jer silkindi.