«Taraz» ben «Oqjetpes» Qazaqstan Premer-lıgasynan shyǵyp qaldy

Jurt nazary búgin «Astana» chempıon bola ma, joq pa, dep «Astana Arenaǵa» aýǵany belgili. Týrdyń, jalpy úshinshi aınalymnyń ortalyq matchynda elordalyq ujym almatylyq «Qaıratqa» 0:2 esebimen utylyp qaldy . Chempıon sońǵy týrda anyqtalatyn boldy.

Kelesi qyzyqty básekelerdiń biri keler jylǵy Eýropa lıgasyna irikteý týrnıriniń joldamasyna talasyp jatqan Pavlodardyń «Ertis» komandasy men qostanaılyq «Tobyldyń» syrt alańda ótkizgen oıyndary boldy desek, qatelespeımiz.

«Oqjetpes» - «Ertis» kezdesýinde Rodrıgo jyldam gol soǵyp, qonaqtardy alǵa shyǵardy. Oıyny júre bastaǵan qonaqtardyń serbııalyq fýtbolshysy Mılosh Stamenkovıch tórt mınýttan soń, 12-mınýtta esepti 0:2-ge jetkizdi. Alaıda namysqa tyrysqan alań ıeleri de qarsylyq kórsetýge tyrysty. 27-mınýtta Dosmaǵambetov gol soǵyp, esepti qysqartty. Ekinshi taımda gol soǵylmaı, pavlodarlyqtar upaı sanyn 45-ke jetkizdi.

Olardyń basty básekelesi «Tobyl» Qaraǵandyǵa baryp, «Shahtermen» teń tústi. Osy matchta da qonaqtar esep ashty. Qostanaılyq ujymnyń otyz jastaǵy jartylaı qorǵaýshysy Jasulan Moldaqaraev 10-mınýtta gol soqty. Biraq qaraǵandylyqtar sapynda óner kórsetetin M. Stoıanovıch 83-mınýtta esepti teńestirdi. «Shahter» oıyn sońynda qyzyl qaǵaz alyp, alańnan bir oıynshysy qýylǵanyna qaramastan, qostanaılyqtar ekinshi goldy soǵa almady. Osylaısha, Qaraǵandydan bir ǵana upaı arqalaǵan «Tobyl» ózi ıelep kelgen 4-oryndy «Ertiske» bosatyp berdi. Endi olardyń enshisinde 44, 6-oryndaǵy «Shahterda» 40 upaı bar.

«Aqtóbe» óz alańynda «Ordabasyny» qabyldady. Ótken týrda «Astanany» jeńgen shymkenttikter bul joly alań ıelerine aıtýly qarsylyq kórsete almady. 55-mınýttaMýarem esep ashyp, 76-mınýtta «Aqtóbe» ekinshi goldy da soqty. 55 upaımen qalǵan «Ordabasy» úshinshi ornyn saqtap qaldy, jalpy, shymkenttikter kelesi oıynnyń da nátıjesine qandaı bolsa da, osy orynda qala bermek. Al 9-oryndaǵy «Aqtóbe» 33 upaı jınap, sońǵy týr aldynda qaýipti aımaqtan birshama uzap ketti.

«Atyraý» alańynda qonaq bolǵan «Taraz» qalaı da úsh upaı enshileý úshin baryn saldy. Onyń ústine bar múmkindigi óz qoldarynda emes ekenin túsinetin tarazdyqtar sońǵy eki oıynda jeńiske jetip, «Aqjaıyqtyń» súrinýine úmitpen qaraýǵa májbúr edi. Naǵyz dramany osy oıynda kórdik. «Taraz» sapynan 69-mınýtta Zaınýtdınov esep ashty. Alaıda týra bir mınýttan soń alań ıeleri sapynda Shıkımıch esepti teńestirip, 77-mınýtta M. Haırýllın ekinshi goldy da soqty. 79-mınýtta Zaınýtdınov dýbl avtory atanyp, «Taraz» jankúıerleriniń júreginde úmit otyn uıalatty. Alaıda 81-mınýtta jeńis dobyn soqqan «Atyraý» úsh upaıdy qanjyǵalady.

Oralda ótken «Aqjaıyq» - «Qaısar» kezdesýinde gol soǵylmady, esep - 0:0.

32-týr qorytyndysy boıynsha, «Taraz» ben «Oqjetpes» kelesi maýsymda Birinshi lıgada oınaıtyn boldy.

Eske sala keteıik, qorytyndy 33-týr oıyndary 5 qarasha kúni, Astana ýaqytymen 16:00-de bastalady.