Taraz ben Moıynqum arasynda tikeleı áýe reısi qaıta iske qosylady
TARAZ. QazAqparat – Jambyl oblysynyń ortalyǵy Taraz qalasy men Moıynqum aýdany arasynda áýe tasymaly iske qosylady. Bul týraly aımaq basshysy Asqar Myrzahmetov aýdanǵa arnaıy barǵan jumys sapary barysynda turǵyndardyń tilegine kóńil bólip, tıisti oryndarǵa naqty tapsyrmalar bergen bolatyn, dep habarlaıdy QazAqparat oblys ákiminiń baspasóz qyzmetine silteme jasap.
Moıynqum – oblys ortalyǵynan eń shalǵaı ornalasqan aýdandardyń biri. Eki ortadaǵy jol qıyndyǵy qatynap júrgen jolaýshylardyń kópten kóńilinde júrgeni daýsyz. Bul másele endi ońynan sheshilmek.
«Jambyl oblysynyń ákimi A. Myrzahmetovtiń tapsyrmasyna sáıkes, shaǵyn avıatsııany damytý qarastyrylyp otyr. Búgingi tańda, oblysymyzdyń ortalyǵynan Moıynqum jáne Tóle bı aýyldaryna áýe marshrýttaryn ashý múmkindikterin zerdeleý, sonyń ishinde qajettilikti anyqtaý, áýeaılaq salýǵa ketetin shyǵyn kólemin anyqtaý boıynsha jumystary júrgizilýde»,-deıdi oblystyq jolaýshylar kóligi jáne avtomobıl joldary basqarmasynyń basshysy Baqytjan Jánibekov.
Aıta keteıik, Moıynqum aýylynan oblys ortalyǵyna bir kezderi ıaǵnı, 1966-1990 jyldar aralyǵynda kúndelikti 2 ret AN-2 jáne ıAK-40 ushaqtarymen áýe tasymaly qyzmet kórsetken. Alaıda, Respýblıkamyz táýelsizdigin alǵan jyldary elimizdegi qarjylyq qıyndyqtarǵa baılanysty atalǵan áýe baǵdary jumysyn toqtatqan. Aldaǵy ýaqytta ol qaıta jandanyp, kóptiń tilegi oryndalmaq. Áýe tasymaly iske qosylǵanda eki aradaǵy avtokólikpen júretin 4-5 saǵattyq jol eki ese qysqaryp, 1-1,5 saǵatta jetýge múmkindik týady dep kútilýde. Búginde aýdanda áýeaılaq salý úshin arnaıy jer de belgilenip qoıylǵan.
