Taraz ben Ázerbaıjannyń Qazaq qalalary arasynda týystyq qarym-qatynas ornaıdy

ASTANA.KAZINFORM - Ázerbaıjan prezıdenti Ilham Álıevtiń Qazaqstanǵa memlekettik sapary barysynda Taraz ben Qazaq qalalary arasynda týysqandyq qatynas ornatý týraly hattamaǵa qol qoıyldy, dep habarlaıdy Kazinform agenttiginiń menshikti tilshisi.

Qazaqstannyń Ázerbaıjandaǵy Elshisi Álim Baıel, ataýy qazaqtarǵa jyly estiletin Ázerbaıjan qalasynyń tarıhy týraly aıtyp berdi.

-Qazaq - Grýzııa men Armenııa shekarasyna jaqyn ornalasqan Ázerbaıjannyń kórkem qalalarynyń biri. Biz onyń ataýynyń etımologııasyna shaǵyn zertteý júrgizip, qyzyqty málimetter taptyq.

16 ǵasyrdyń basynda ázerbaıjan-parsy bıleýshisi Shah Ismaıl han Muhammed Shaıbanımen jaýlasyp turdy. Muhammed Shaıbanı qazaq hany Qasymnyń nemere aǵasy bolǵandyqtan, Qasym oǵan kómekke ásker jiberedi. Shah Ismaıl shaıqastarda tutqynǵa túsken qazaq jaýyngerlerin Kavkazǵa jiberdi. Sodan beri qazaq batyrlary turǵan aımaq osy ataýmen belgili, - dedi Elshi.

Dıplomattyń aıtýynsha, búginde Ázerbaıjannyń soltústik-batysynda Qazaq aýdany men Qazaq qalasy bar, onda qazaqtarǵa antropologııalyq jaǵynan óte uqsas adamdardy áli de kezdestirýge bolady.

-Tuńǵysh ázerbaıjandyq áskerı ushqysh Farrýh Aǵa Gaıbovtyń túrine qarasańyz, jetkilikti. Qazaq - Ázerbaıjannyń qurt jasaıtyn jalǵyz aımaǵy. Onyń turǵyndary jaýyngerligimen tanymal. Olar jylqyny jaqsy kóredi jáne aqyndaryn qurmetteıdi. Sondyqtan Qazaq pen kóne Taraz arasynda baýyrlas qala baılanysyn ornatý durys dep sheshtik. Óıtkeni, Taraz 15 ǵasyrda Qazaq handyǵy qurylǵan jerde ornalasqan. Bul joǵary sımvoldyq qadam baýyrlas halyqtarymyz arasyndaǵy baılanysty odan ári nyǵaıta túsedi, – dedi Álim Baıel.

Elshi Ázerbaıjanda eki el tarıhyndaǵy ortaq tustardy kórsetetin kóptegen jer-sý ataýlary bar ekenin atap ótti.

-Máselen, Qypshaq pen Jalaıyr degen eldi mekender, saqtarmen baılanysty ataýlar bar. Demek, bizdiń qazirgi strategııalyq áriptestigimiz ben baýyrlastyq qarym-qatynasymyz óte berik tarıhı negizge negizdelgen, - dep túıindedi dıplomat.

Álim Baıel túrki elderiniń tarıhshylary osynaý qyzyqty tarıh betterin zertteýge kásibı den qoıýy kerektigin atap ótti.

Osyǵan deıin byltyr Ázerbaıjan arqyly qazaqstandyq munaıdy tasymaldaý 1,5 mln tonnaǵa jýyqtaǵany týraly jazdyq.