Taraz avtobýstarynda jolaqy 90 teńgege qymbattaı ma
TARAZ. QazAqparat - Tarazda qoǵamdyq kóliktegi jolaqy 90 teńgege kóteriledi degen málimet shyndyqqa janaspaıdy, dep habarlaıdy QazAqparat.
Bul týraly agenttik tilshisine Jambyl oblysy ákimdigi jolaýshylar kóligi jáne avtomobıl joldary basqarmasynyń basshysy Baqytjan Jánibekov aıtyp berdi. Basqarma basshysy áleýmettik jelilerde taraǵan aqpardyń negizsiz ekenin jetkizdi. Onyń aıtýynsha, Taraz qalasynda jolaýshy tasymaldaýmen aınalysatyn mekeme basshylary jol júrý tarıfin 90 teńgege kóterý jóninde tek usynys bildirgen. Alaıda, usynys negizinde sheshim qabyldanbaǵan.
«Qoǵamdyq kólik tarıfiniń 90 teńgege kóterilýi jaıly málimet jalǵan. Qazir bul salada júıeli jumystar qolǵa alynyp jatyr. Áýeli jolaýshylar aınalymyn aıqyndaý maqsatynda hranometraj júrgiziledi. Bul óz kezeginde tasymaldaýshy mekemeniń tabysy men shyǵynyn aıqyndaıdy. Atalǵan is-shara Taraz qalasy ákimdiginiń jumyspen qamtý jáne áleýmettik baǵdarlamalar bólimimen birlesip atqarylady. Oǵan jumyssyz esebinde tirkelgen 50-60 azamat tartylyp, jyl sońyna deıin qaladaǵy 43 baǵyttaǵy 459 avtobýs qamtylady», - dedi Baqytjan Jánibekov.
Sonymen qatar, ol jolaýshylar aınalymy, ıaǵnı tasymaldanǵan adam sany anyqtalǵannan keıin jolaqy QR kólik jáne kommýnıkatsııa mınıstriniń buıryǵymen bekitilgen tarıfterdi esepteý ádistemesine sáıkes qaıta esepteletinin aıtty. Esep nátıjesinde ǵana naqty sheshim qabyldanbaq.
«Bul máseleni oblys basshysy Asqar Myrzahmetov óz baqylaýynda ustap otyr», - degen Baqytjan Jánibekov sheshim qabyldaý barysynda qoǵamnyń pikiri, qalalyq baǵyttardaǵy avtobýs quramynyń jańartylýy jáne turǵyndardyń áleýmettik jaǵdaıy mindetti túrde eskeriletinin tilge tıek etti.
Aıta keteıik, jýyrda qalalyq baǵyttardaǵy avtobýstarǵa «Tsıfrlyq Qazaqstan» baǵdarlamasy aıasynda elektrondy bılet júıesi engizile bastaǵan edi. Búgingi tańda kompanııalardyń qarjylyq usynymdary zerdelenýde. Bul júıe óz kezeginde jasyryn qarjy aınalymyn boldyrmaýǵa septigin tıgizbek.
Avtor: Ǵıbrat Sembaı
