Taraz áýejaıy jabyldy
ASTANA. QazAqparat - Aýa raıyna baılanysty Taraz áýejaıy jabyldy, dep habarlaıdy «QazAqparat» HAA QR IDM Azamattyq avıatsııa komıtetine silteme jasap.
Vedomstvonyń Feısbýktegi paraqshasyndaǵy jazbada: «Taraz qalasynyń áýejaıy 27 jeltoqsan kúni jergilikti ýaqytpen 05:00-de qolaısyz aýa raıyna baılanysty ýaqytsha jabyldy. Qazirgi kezde áýejaıda jeldiń jyldamdyǵy sekýndyna 25 metrge, ekpini 28-30 m/s-qa deıin jetedi. Sondaı-aq ushý-qoný jolaǵyna 5 mm muz qatqan. Ushý qaýipsizdigin qamtamasyz etý maqsatynda birqatar ishki reıster toqtatyldy nemese keıinge qaldyryldy», - delingen.
Jolaýshylarǵa áýe kompanııalaryna telefon soǵyp, óz reısterin aldyn ala anyqtap alý jóninde keńes berildi.
