Taraz áýejaıy avıaotyndy qymbat satqany úshin aıyppul tóleıdi
ASTANA. KAZINFORM — Jambyl oblysyndaǵy «Áýlıe-Ata» halyqaralyq áýejaıy avıaotyndy ótkizý kezinde monopolııalyq joǵary baǵa belgilegen. Bul týraly Qazaqstan Respýblıkasy Básekelestikti qorǵaý jáne damytý agenttiginiń Jambyl oblysy boıynsha departamenti habarlady.
Monopolııaǵa qarsy organ áýejaıdyń qyzmetine júrgizilgen taldaý nátıjesinde básekelestik zańnamasynyń buzylǵanyn anyqtaǵan. Tergep-tekserý barysynda kásiporynnyń avıaotyndy ótkizý kezinde monopolııalyq joǵary baǵa belgilegeni belgili boldy.
Áýejaı bul qorytyndymen kelispeı, tergep-tekserý nátıjesin birinshi jáne ekinshi satydaǵy sottarda daýlaǵan. Alaıda Jambyl oblystyq sotynyń ákimshilik ister jónindegi sot alqasy tergep-tekserý nátıjelerin zańdy ári negizdi dep tanydy.
Keıin Taraz qalasynyń ákimshilik quqyq buzýshylyqtar jónindegi mamandandyrylǵan sotynda ótken otyrysta áýejaı óz kinásin moıyndady.
Nátıjesinde kásiporyn Ákimshilik quqyq buzýshylyq týraly kodekstiń 159-babynyń 3-bóligi boıynsha jaýapkershilikke tartyldy. Oǵan 3,2 mln teńge aıyppul salyndy.
Budan bólek, monopolııalyq qyzmetten alynǵan 25,2 mln teńge kiris tárkilendi.
Sondaı-aq monopolııaǵa qarsy organ áýejaıǵa zań buzýshylyqty toqtatý týraly nusqama berdi. Kásiporynǵa avıaotyn baǵasyn ekonomıkalyq turǵydan negizdelgen deńgeıde belgileý mindetteldi.
Eske salaıyq, buǵan deıin Atyraý oblysynda «Potentsıal Oıl» JShS qorshaǵan ortany qorǵaý talaptaryn buzǵany úshin 1,4 mıllıard teńgeden astam ákimshilik aıyppul tólegenin habarlaǵanbyz.
