Taraz álem chempıony Zúlfııa Gabıdýllınany qarsy aldy
TARAZ. QazAqparat - Tarazda Meksıkadan altyn medalmen oralǵan paralımpıada chempıony Zúlfııa Gabıdýllınamen saltanatty kezdesý uıymdastyryldy, dep habarlaıdy «QazAqparat» HAA tilshisi Jambyl oblystyq ákimdiginiń sport jáne dene shynyqtyrý basqarmasyna silteme jasap.
Almaty - Tashkent respýblıkalyq tasjolynda álem chempıonyn týystary, dostary men jankúıerleri plakattarmen kútip aldy.
Zúlfııa Gabıdýllına - 2016 jyly ótken XV jazǵy Paralımpıada oıyndarynyń sýda júzýden álem chempıony, sýda júzýden halyqaralyq sanattaǵy sport sheberi, Qazaqstan Respýblıkasy ulttyq qurama komandasynyń múshesi, birneshe dúrkin álem rekordshysy. Onyń jattyqtyrýshysy múmkindigi shekteýli jandar úshin Taraz sport klýbynyń dırektory, júzýden QR ulttyq quramasynyń bapkeri, QR eńbek sińirgen jattyqtyrýshysy - Sáttar Beısembaev.
2017 jyldyń 2-7 jeltoqsan aralyǵynda Mehıkoda (Meksıka) júzýden múmkindigi shekteýli sportshylar arasynda álem chempıonaty ótti. Jarysqa 126 elden 900 sportshy, sonyń ishinde 55 elden 300 sportshy qatysty. Júzýden Qazaqstannyń namysyn segiz sportshy qorǵady. Olar alty medal jeńip alsa, sonyń ishinde eki medaldi jambyldyq sportshy Zýlfııa Gabıdýllına qanjyǵasyna baılady.
Zúlfııa Gabıdýllına 50 metr qashyqtyqqa erkin stılde júzý boıynsha birinshi oryndy jeńip aldy. Sonymen qatar, oǵan Halyqaralyq Paralımpıada komıtetinen 2017 jylǵy Búkilálemdik jeńister serııasy úshin arnaıy nagrada tabystaldy.
Onyń aıtýynsha, álemniń barlyq sportshylarynyń basyn qosqan álem chempıonatynda alǵash ret «altyn» medal jeńip alý - ol úshin úlken qýanysh.
«Bul otandyq júzý tarıhyndaǵy alǵashqy altyn, - dep atap ótti jambyldyq sportshynyń jattyqtyrýshysy Sáttar Beısenbaev. - Buǵan deıin biz altyn alǵan joq edik. Bul chempıonatta bizdiń júzýshiler jaqsy nátıje kórsetip, eki altyn bir kúmis medalge qol jetkizdi. Erler arasynda eki kúmis jáne bir qola bar. Biz olardy maqtanysh tutamyzmen maqtanamyz».
Eske salaıyq, Germanııanyń Berlın qalasynda tirek-qımyl apparaty men kóz janarynda aqaýy bar sportshylar arasynda ótken ashyq chempıonatta Zúlfııa Gabıdýllına erekshe kózge tústi. Ol fınalda erkin stılde 200 metr qashyqtyqqa júzý kezinde jańa álemdik rekord ornatty, kórsetkishi - 03:26,65 sekýnd. Sonymen qatar, ol erkin stılde 100 metr qashyqtyqqa júzý boıynsha eń úzdik kórsetkish kórsetip, 50 metr qashyqtyqqa shalqalap júzýde ekinshi orynǵa ıe boldy.
