Taraz ÁKK turaqtandyrý qorynyń taýarlaryn bólýde sybaılastyqqa barǵan - Antıkor

TARAZ. QazAqparat - «Taraz» áleýmettik-kásipkerlik korporatsııasyna sybaılas jemqorlyqqa qarsy júrgizilgen taqyryptyq taldaýdyń qorytyndysy shyqty. Anyqtalǵan derekterdi Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti Preventsııa basqarmasynyń basshysy Daýren Omarov baıandady, dep habarlaıdy QazAqparat.

Júrgizilgen taldaý barysynda kásipkerlik sýbektilerine artyqshylyq kórsetý, jer telimderin zańsyz berý, aldyn ala tıimsiz ınvestıtsııalyq jobalardy qarjylandyrý, mıkroqarjy uıymdaryna qarjy bólinýde baqylaýdyń joqtyǵymen baılanysty eleýli sybaılas jemqorlyq táýekelderi belgili bolǵan. Sondaı-aq, turaqtandyrý qorynyń qyzmetin uıymdastyrýdaǵy júıeli problemalar da bar.

«Máselen, Jýaly aýdany ákimdiginiń haty negizinde JK «A»-ǵa turaqtandyrý qorynan 1 tonna qant, 500 keli kúrish jáne 500 lıtr ósimdik maıy, sol sııaqty Merki aýdany ákimdiginiń haty negizinde JK «B»-ǵa turaqtandyrý qorynan 10 tonna qant jeńildetilgen baǵamen bólingen. ıAǵnı, turaqtandyrý qorynan azyq-túlik taýarlaryn ótkizý jergilikti atqarýshy organdardyń laýazymdy tulǵalarynyń «silteýimen» júzege asyrylady, olar taýardy qandaı kásipkerler arqyly ótkizý kerektigin kórsetedi», - dep atap ótti Dáýren Omarov.

Al ol kásipkerler taýardy arzan baǵamen alyp, ony qymbattatyp satýy múmkin dep túsindirdi ol.

«Osylaısha, JK qoımalarynda saqtalatyn taýarlardy túgendeý nátıjesinde jalpy somasy 11 mln teńgeden astam somaǵa 23 myń lıtr kóleminde kúnbaǵys maıynyń tapshylyǵy anyqtaldy», - dep habarlady spıker.