Taratylyp jatqan 9 banktiń salymshylary qarajatyn shildege deıin ala alady

NUR-SULTAN. QazAqparat – Qazaqstanda 9 bank taratylyp jatyr. Atalǵan banktiń salymshylary ózderine tıesili qarajatyn 3 shildege deıin ala alady. Bul týraly QazAqparat Qazaqstannyń depozıtterge kepildik berý qoryna silteme jasap habarlaıdy.

Taratylyp jatqan bankterdiń salymshylaryna kepildik berilgen ótem somasynyń 98%-dan astamy tólengen. Bul shamamen 113,1 mlrd teńgeni quraıdy.

Qazaqstannyń depozıtterge kepildik berý qory kepildik berilgen ótemdi tóleý jáne talap etilmegen ótem somalaryn Biryńǵaı jınaqtaýshy zeınetaqy qoryna aýdarý tártibin túsindirdi.

«Taratylatyn segiz banktiń salymshylary ózderine tıesili ótem aqshalardy sońǵy kúnin qosa alǵanda 2022 jyldyń 1 mamyryna deıin ala alady. Bul «Valıýt-Tranzıt Bank» AQ, «Qazınvestbank» AQ, «Delta Bank» AQ, «Eksımbank Qazaqstan» AQ, «Qazaq Banki» AQ, «Astana Banki» AQ, «Tengri Bank» AQ jáne «AsiaCredit Bank (AzııaKredıt Bank)» AQ salymshylary. «Capital Bank Kazakhstan» AQ lıtsenzııasynan keıinirek aıyrylǵandyqtan, onyń salymshylarynyń kepildik berilgen ótemdi sońǵy kúnin qosa alǵanda bıylǵy jyldyń 3 shildesine deıin alýǵa múmkindikteri bar», - delingen habarlamada.

Ótem alýǵa ótinishti dástúrli tásilmen de Tólemderdiń elektrondyq portaly (TEP) arqyly onlaın túrinde de berýge bolady.

Tólem merzimi aıaqtalǵan soń, talap etilmegen ótem somalary salymshylardyń BJZQ-da ashylǵan, erikti zeınetaqy jarnalaryn esepke alýǵa arnalǵan jeke zeınetaqy shottaryna aýdarylady. Taratylatyn segiz banktiń klıentteri ótem aqshalarynyń BJZQ-ǵa aýdarylýyn aǵymdaǵy jyldyń 31 mamyryna deıin , al «Capital Bank Kazakhstan» AQ salymshylary 2 tamyzǵa deıin kúte alady.

Al tólem merzimin dáleldi sebeptermen ótkizip alǵan salymshy jazbasha ótinishpen Qorǵa tikeleı júgine alady.