Taratylǵan keıbir jeke dinı birlestikter qyzmetin jalǵastyrýda - Din isteri agenttiginiń tóraǵasy
ASTANA. 15 mamyr. QazAqparat - Qazirgi ýaqytta qaıta tirkeý rásiminen ótpegen dinı birlestikterdi taratýdyń zańdy úrdisi aıaqtalyp qaldy.
Búginde 436 aryz boıynsha 430 akti zańdyq kúshine endi, qalǵan aryzdar boıynsha jumys jaqyn arada aıaqtalady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Din isteri agenttiginiń tóraǵasy Qaırat Lama Sharıf málim etti.
«Belgilengen tártipte tirkeýden ótken dinı birlestikter ǵana dinı qyzmetti júzege asyratynyn atap ótý qajet. Sonymen birge, taratylǵan keıbir jeke dinı birlestikter qabyldanǵan sot sheshimderine qaramastan, dinı qyzmetin júzege asyrýdy jalǵastyrýda. Oblystardaǵy Din isteri departamentteri basqa memlekettik organdarmen birlese otyryp, túsindirý jumystarymen qatar sot sheshimderin oryndaý boıynsha naqty tájirıbelik sharalar ótkizýde. Bul úshin jergilikti jerde taratý komıssııasy jumys isteıdi»,-dedi agenttik basshysy.
Onyń sózine qaraǵanda, Serebrıansk qalasy men Zyrıan aýdanynyń Jańa Buqtyrma aýylynda qaıta tirkeý rásimi aıaqtalǵan soń taratylǵan «Zyrıan aýdanynyń Jetinshi kún adventısteri hrıstıandarynyń shirkeýi» dinı birlestigi qyzmet etýin jalǵastyrǵan.
«Sondaı-aq, tirkelmegen birlestikterdiń dinı is-sharalardy ótkizý faktileri de baıqaldy. Biz udaıy túsindirý jumystaryn júrgizemiz, qajet bolǵan kezde zańnama aıasynda ákimshilik sharalar qoldanylady»,-dep túıdi Qaırat Lama Sharıf.
