Taras Shevchenkonyń kitaby qazaq tilinde shyǵady
Bul týraly búgin Astanada Ýkraınanyń mádenı-aqparattyq ortalyǵynyń ashylý saltanatynda QR-daǵy Ýkraına isteri boıynsha ýaqytsha senimdi ókili Volodymyr Djıdjora aıtty.
Aıta ketsek, Ýkraına eli óz tarıhyndaǵy tuńǵysh Halyqaralyq ister boıynsha bas hatshylyǵy - birinshi Syrtqy ister mınıstrliginiń qurylýynyń 100 jyldyǵyn atap ótip jatyr.
Volodymyr Djıdjoranyń aıtýyna qaraǵanda, osydan týra I ǵasyr buryn Vladımır Vınnıchenko men Aleksandr Shýlgın Ýkraına elinde tuńǵysh Halyqaralyq ister boıynsha bas hatshylyǵynyń qurylǵany týraly qujatqa qol qoıǵan. QR-daǵy Ýkraına isteri boıynsha ýaqytsha senimdi ókili dıplomattardyń kásibı jumysy dál osy kezeńnen bastaý alatynyn aıtady.
Ataýly kúnge oraı, Ýkraına elshiligi Astanada Ýkraınanyń mádenı-aqparattyq ortalyǵy ashyp otyr .
«Osy ortalyq arqyly biz búkil Ýkraına týraly qajetti aqparattardy bere alamyz, tilshiler men kásipkerlerge arnap jıyn ótkizemiz. Sonymen qatar, dál osynda týrıstik jáne ınvestıtsııalyq múmkindikter ashylar degen senimimiz zor. Buǵan qosa osynda ýkraın tili, tarıhy men geogratsııasy oqytylady. Ortalyq tańerteńgi saǵat 10:00 ýaqytynan keshki 19:00-ge deıin jumys isteıtin bolady», - deıdi ol.
Senimdi ókil sonymen birge, aldaǵy ýaqytta tyń jobalar da baryn atap ótti.
«Osy ortalyqtyń bazasynda ýkraın aqyny Taras Shevchenkonyń kitabyn qazaq jáne ýkraın tilderinde jaryqqa shyǵarǵaly jatyrmyz. Kitaptyń tusaýkeseri bizdiń búgin jańadan ashylǵan ortalyqta ótpek», - deıdi Volodymyr Djıdjora.
