Taran aýdanynyń ataýy ózgere me - Qostanaı oblysy
QOSTANAI. QazAqparat - Qostanaı oblysyndaǵy Taran aýdanynyń ataýyn ózgertýge qatysty kópshilik tyńdaýy ótedi, dep habarlaıdy QazAqparat.
Buǵan deıin habarlaǵanymyzdaı, Qostanaıda «Onomastıkalyq jańǵyrý - rýhanı jańǵyrý kepili» atty respýblıkalyq ǵylymı-praktıkalyq konferentsııa ótti. Konferentsııa barysynda Ahmet Baıtursynovtyń 145 jyldyǵyna oraı Aqkól aýylyna ult kóseminiń esimi berilgeni, Beıimbet Maılınniń 125 jyldyǵyna oraı Taran aýdanyna atyn berý, Jeńis kúni qarsańynda oblys ortalyǵyndaǵy kóshelerdiń birin UOS ardageri qostanaılyq Estaı Eşanovtyń esimimen ataý usynystary qaralyp jatqany jarııa etildi.
Osyǵan baılanysty 30 qyrkúıek kúni saǵat 11:00-de Taran aýdany mádenıet úıinde turǵyndardyń qatysýymen tyńdaý ótedi. Habarlandyrý jergilikti «Maıak» gazetinde jarııalanǵan.
Osy kúni Taran aýdanyndaǵy Taran aýylyna Áıet esimin berý máselesi de talqylanady. Eske salsaq, Áıet - Tobyl ózeniniń bir salasy.
