Tar bólme, ortaq ájethana: Atyraýdaǵy beıimdeý ortalyǵy basqa ǵımaratqa kóshirildi
ATYRAÝ. KAZINFORM – Atyraýdaǵy kámeletke tolmaǵandardy beıimdeý ortalyǵy ýaqytsha «Shańyraq» balalar úıiniń aýmaǵyna kóshirildi. Qazir munda 25 bala tárbıelenip jatyr.
Buǵan deıin ortalyq Atyraý qalasynyń Avangard shaǵynaýdanynda ornalasqan bolatyn. Alaıda jyl basynda oblys prokýrorynyń tapsyrmasymen nysanǵa keshendi tekseris júrgizilip, birqatar zań buzýshylyq anyqtalǵan. Atyraý qalasynyń prokýrory Mergen Meńdiǵalıevtiń aıtýynsha, burynǵy ǵımarat qoldanystaǵy talaptarǵa tolyq sáıkes kelmegen.
– Osyǵan deıingi ǵımarat birqatar talapqa saı bolmady. Ol boıynsha prokýrorlyq qadaǵalaý aktisi engizildi. Nátıjesinde balalar ýaqytsha osy jerge kóshirildi. Bul jerde balalardyń qaýipsizdigi men bos ýaqytyn tıimdi ótkizýi úshin barlyq jaǵdaı jasalǵan, – dedi ol.
Tekserý barysynda ǵımarattaǵy bólmelerdiń tarlyǵy, ashananyń sanıtarııalyq talaptarǵa sáıkes kelmeýi, uldar men qyzdardyń ortaq ájethana paıdalanýy, oıyn alańdarynyń qaýipsizdik talaptaryna saı jabdyqtalmaýy jáne ár balaǵa tıesili aýmaqtyń belgilengen normadan tómen ekeni anyqtalǵan. Sondaı-aq órt qaýipsizdigi talaptarynyń tolyq saqtalmaǵany belgili boldy.
Ortalyq ujymy endi jańa ǵımarat qurylysynyń bastalýyn kútip otyr. Buǵan deıin oblystyq bilim basqarmasynyń basshysy Marat Ábýov Juldyz-2 yqshamaýdanynda kámeletke tolmaǵandardy beıimdeý ortalyǵynyń jańa ǵımaraty salynatynyn málimdegen edi.
Qazir nysannyń jobalyq-smetalyq qujattamasy ázirlenip, memlekettik saraptamadan ótip jatyr.
Buǵan deıin ortalyqtan balalardyń qashyp ketý deregi tirkelgen edi.
