Tapsyrys erte berilse óńirlerge kómir qazan aıyna deıin tolyq jetkiziledi - QTJ-Júk tasymaly
Kompanııa basshylyǵy ekinshi jarty jyldyqta kómir tasymaldaýdy tıimdi uıymdastyrý maqsatynda Semeı, Pavlodar, Qaraǵandy temirjol bólimsheleri, iri kómir kenishteriniń basshylyǵymen, júk jóneltýshilerdiń qatysýymen jergilikti jerlerde kezdesýler uıymdastyryp, osy ózekti jaıdy talqylady.
«Kompanııa 2018 jyly 106,5 mıllıon tonna kómir tasymaldaýdy josparlap otyr. Onyń 71,9 mıllıon tonnasy respýblıka ishilik baǵdarlarǵa jiberiledi. Bıylǵy boljaldy tasymal kólemi ótken jylmen salystyrǵanda 3,5% joǵary bolmaq», - deıdi «QTJ-Júk tasymaly» AQ vıtse-prezıdenti Marat Shákenov.
«Eger de kómir tıeýge tapsyrystar maýsym aıynan bastap birkelki júrgiziletin bolsa, onda biz áleýmettik-turmystyq kómirlerdi qazannyń 1-ine deıin tıisti óńirlerge jetkizip bere alamyz», - deıdi M. Shákenov.
Onyń aıtýynsha, tapsyrysty der kezinde berý aldaǵy jylý berý maýsymy qarsańyndaǵy jergilikti turǵyndarǵa áleýmettik-turmystyq kómir jetkizýdegi daý-damaıdy boldyrmaıdy.
«QTJ-Júk tasymaly» AQ Júk jónindegi atqarýshy dırektory Aıdar Isaqov júk jóneltýshilerge aı saıyn jyl aıaǵyna deıin tasymaldaýdy josparlaǵan kómir júkteri týraly aqparattardy aldyn ala berýlerin surady. «Biz sonda ǵana kómir tasymaldaýdy birkelki, naqty josparlap júrgize alamyz. Kómirdiń aılyq ortasha tıelýi shamamen 8,7 mıllıon tonna kóleminde bolýy tıis», - deıdi A. Isaqov.
Temirjolshylar júk jóneltýshilerdiń jyljymaly quramdy tıimdi paıdalansa, vagondardyń júk tıelmeı bos turyp qalýyn boldyrmaı, áleýmettik-turmystyq kómirdiń jylý ortalyqtaryna da kún sýytpaı jetkizilýin qamtamasyz etýge bolatynyna senimdi.
Óńirlerdegi keleli keńesterde strategııalyq júkterdi jetkizýdiń jaıy jan-jaqty qaraldy. Onyń ishinde Jylý ortalyqtaryna qatty otyndy jetkizý josparlaryn qaıta qaraý kózdelýde. Kómir jetkizý josparyn oryndamaý kóbine júk jóneltýshilerdiń menshiginde vagon parki joq kompanııalarmen kelisim jasaýynan da týyndap otyr.
Eske sala ketsek, byltyr kúzde Qazaqstanda kómir naryǵynda baǵa kóterilip, qatty otyn jetkizilýinde tapshylyq týyndaǵan bolatyn. QR Energetıka mınıstrliginiń málimetinshe, kómir baǵasynyń sharyqtaýyna deldaldar yqpal etken. Sonymen qatar jylý maýsymy ótý kezinde kómir óndirýshi kompanııalarǵa kómir tıeýge arnalǵan vagondar ýaqytynda usynylmaýy tapshylyqtyń týyndaýyna sebepshi bolǵan.
