Tapsyru júıesi memlekettik múlik berýdi tsıfrlandyrdy
ASTANA. KAZINFORM – Qazaqstanda memlekettik múlikti bir memlekettik organnan ekinshisine berý úderisi tolyq tsıfrlandyryldy. Bul týraly Qarjy vıtse-mınıstri Áset Turysov málim etti.
Onyń aıtýynsha, buǵan deıin bul rásim qaǵaz júzinde júrgizilgen.
Memlekettik múlikti elektrondy formatta berýge arnalǵan «Tapsyru» portaly iske qosyldy. Qazir júıege 18,6 myń memlekettik uıym qosylǵan. Portalda shamamen 22 mln nysan týraly málimet jınaqtalǵan.
Jobany iske asyrý úshin qajetti normatıvtik-quqyqtyq baza qalyptasty.
- Endi memlekettik organdar jańa múlik satyp alýdyń ornyna qajetti aktıvterdi basqa memlekettik organdardan júıe arqyly elektrondyq túrde ala alady. Bul bıýdjet qarajatyn tıimdi paıdalanýǵa jáne shyǵyndardy qysqartýǵa yqpal etedi, – dedi vıtse-mınıstr.
Sondaı-aq júıege jasandy ıntellekt elementteri engizilgen. Olar memlekettik organdardyń qajettilikterin boljaýǵa jáne shyǵyndardy ońtaılandyrýǵa múmkindik beredi.
Máselen, bir ǵımaratta birneshe memlekettik organ ornalassa, júıe kommýnaldyq jáne jaldaý shyǵyndaryn biriktirip, ortaq shart jasasýdy usyna alady.
Vıtse-mınıstrdiń dereginshe, joba iske qosylǵaly beri 2 763 rásim aıasynda 34 myńnan astam nysan berilgen. Olardyń jalpy quny 232 mlrd teńgeden asady.
Qarjy mınıstrligi bul tetik memlekettik múlikti basqarý tıimdiligin arttyryp, bıýdjet qarajatyn únemdeýge múmkindik beredi dep esepteıdi.
Aıta keteıik, buǵan deıin salyq júıesindegi 14 aqparattyq platforma 5 negizgi júıege biriktirilgeni jaıly habarladyq.
