Tapsyrma tıisti deńgeıde oryndalmady: Prezıdent mektepterge JI engizý jumysyn synady
ASTANA. KAZINFORM – Memleket basshysy Qasym-Jomart Toqaev orta bilim berý júıesine JI engizý tapsyrmasynyń tıisti deńgeıde oryndalmaǵanyn synǵa aldy. Prezıdent balalar men pedagogterdiń JI-di durys ári júıeli qoldaný tártibin belgileıtin pármendi sharalardy shuǵyl qabyldaýdy tapsyrdy.
Bıyl mamyr aıynda Prezıdent Orta bilim berý júıesine jasandy ıntellektini endirý jónindegi sharalar týraly arnaıy Jarlyqqa qol qoıdy.
– Alaıda jańa oqý jylynyń qarsańynda tapsyrma tıisti deńgeıde oryndalmady. Bul úlken kemshilik. Sebebi nede? Báribir tehnologııa qaryshtap damyǵan zamanda mundaıǵa jol berýge bolmaıdy. Balalar men pedagogterdiń jasandy ıntellektini júıeli ári durys qoldaný tártibin belgileıtin pármendi sharalardy shuǵyl qabyldaý qajet, – dedi Q. Toqaev elordada respýblıkalyq Tamyz konferentsııasynda.
Onyń aıtýynsha, jastar, ásirese, aýyl jastary tsıfrlyq qurylǵylardy, máselen, smartfondy turaqty tabys tabýǵa paıdalana bilýi kerek.
– Sizderdi qulaqqaǵys eteıin, Joldaýda osy jóninde naqty mindet qoıamyn. Bizge tsıfrlyq memleketten tsıfrlyq halyq ekonomıkasy degen túsinikke kóshý qajet. Basqasha aıtqanda, jasandy ıntellekt pen onyń múmkindikteri ermek emes, kiris kózi bolýǵa tıis, – dep eskertti Memleket basshysy.
Joǵary bilim salasynda JI-di paıdalanýdyń etıkalyq, quqyqtyq jáne uıymdastyrý erekshelikterin eskeretin ortaq standart bar. Endi Úkimet dál osyndaı standartty orta jáne kásiptik-tehnıkalyq bilim berý júıesine de engizýi qajet.
Buǵan deıin Qasym-Jomart Toqaev Prezıdent «Órleý» ortalyǵyn synǵa alyp, pedagogterdi attestatsııalaý talaptaryn jeńildetýdi tapsyrǵan edi.
Prezıdent muǵalimderdi qaǵazbastylyqtan, attestatsııadan jáne paıdasyz tekseristerden bosatýdy tapsyrdy.
Sondaı-aq Prezıdent áleýmettik jelide bilim berý salasyna qatysty negizsiz daý-damaı men aıqaı-shýdyń kóbeıgenin synǵa aldy.
