Tapshylyq bilinip otyrǵan mamandyqtarǵa oblystar boıynsha kvotalar bólinse ıgi - H. Ýálıev
ASTANA. 27 qańtar. QazAqparat /Qanat Mámetqazyuly/ - Óńirlerde tapshylyq bilinip otyrǵan mamandyqtarǵa oblystar boıynsha kvotalar bólinse ıgi. Búgin QR Parlamenti Cenatynyń jalpy otyrysynda Úkimet basshysynyń atyna joldaǵan saýalynda depýtat Husaıyn Ýálıev osylaı málim etti.
«Bilim berý júıesinde biz maqsatty túrde halyqaralyq standarttarǵa qaraı qadam basyp kelemiz. Alaıda, osyndaı baǵyt ustana otyryp, elimizdegi az jabdyqtalǵan mektepterdiń problemasyna jáne birqatar mamandyqtar boıynsha kadrlyq tapshylyq máselesine nazar aýdarǵanymyz jón. Jalpy, elimizde az jabdyqtalǵan mektepter sany 50 paıyzǵa jýyq bolsa, soltústik óńirdegi aýyldarda bul 70-80 paıyzǵa deıin jetedi. Budan bólek, jekelegen óńirlerde, onyń ishinde aýyldyq jerlerde dárigerler tapshylyǵy da júzdep sanalady. Alaıda osyǵan qaramastan jaǵdaıdyń oń úrdiske ıe bolatyny baıqalmaıdy», - dedi senator. Osyǵan oraı, depýtat H. Ýálıev qoǵam úshin asa mańyzdy sanalatyn joǵarydaǵy problemalardy sheshýdiń eki nusqasyn usynady.
«Birinshiden, az jabdyqtalǵan mektepter boıynsha keń aýqymda resýrstyq ortalyqtardy qurý barysynda keń beıindi muǵalimderdi de daıarlaý qajet. Máselen, úsh baǵytta - gýmanıtarlyq, jaratylystaný jáne tehnıkalyq. Ekinshiden, asa tapshy bolyp otyrǵan medıtsınalyq mamandyqtar boıynsha jastardy tıisti oqý oryndarynda oqytý úshin oblystar boıynsha kvotalar bólingeni abzal. Oǵan arnaıy monıtorıng júrgizilse de ıgi», - deıdi senator.
