Tapanshamen qarýlanǵan eki jigit Semeıdegi qonaqúıdi tonaǵan
ÓSKEMEN. QazAqparat - Eki jas jigit gaz tapanshasymen qorqytyp, Semeıdegi qonaqúıdi tonaǵan. Qonaqúıdiń kassasyn tonaý týraly habarlama túnde túsken, dep habarlaıdy «QazAqparat» HAA qalalyq ІІB-ge silteme jasap.
Urylardy izdeýge qalanyń barlyq jol-patrýldik qyzmeti tartyldy.
Olardy beınebaqylaý kameralary arqyly qolǵa túsirgen. Polıtsııa tonaýshylardan qara betperde men isten shyqqan «PM-9» degen jazýy bar gaz tapanshasyn tapqan.
Qonaqúı qyzmetkerleriniń málimdeýinshe, aldymen betperde kıgen aryq jigit kirgen. Tapanshaǵa uqsaıtyn qolyndaǵy zatymen qorqytyp, sol kúngi jınalǵan bar-joǵy 15 myń teńgeni alyp ketken. Al onyń sybaılasy betperdesiz kóshede esiktiń aldynda turǵan. Kýágerler onyń túrin esterine saqtap qalǵan.
Ustalýshylardyń birin qonaqúı qyzmetkerleri birden tanydy.
Ol 27 jastaǵy jumyssyz, buryn sottalǵan semeılik bolyp shyqty. Byltyr jazda bostandyqqa shyqqan. Al onyń kómekshisi 19 jastaǵy jumyssyz jas jigit buryn isti bolmaǵan.
Kúdiktiler Semeı qalalyq ІІB-niń ýaqytsha ustaý oqshaýlaǵyshyna qamaldy. QR QK 191-baby boıynsha qylmystyq is qozǵalyp, sotqa deıingi tergeý amaldary bastaldy.
