Tapanshadan oqý atý sporty elimizde qalaı damyp keledi – mamanmen suhbat
Aıta keteıik, praktıkalyq oq atý kásibı sport retinde ótken ǵasyrdyń 50-jyldary AQSh-ta bastaý aldy. Onda birneshe qarý túrleri – tapansha, vıntovka, bytyraly myltyq qoldanylady. Halyqaralyq praktıkalyq atý konfederatsııasy (IPSC) 1976 jyly qurylǵan. Qazaqstanda bul sport 2010 jyldary belsendi júrgizile bastady.
Kapıtan Erlan Bazarbaev 33 jasta. Ol Soltústik Qazaqstan oblysy Shalaqyn aýdanynda dúnıege kelgen. Kókshetaý qalasyndaǵy Sh. Ýálıhanov atyndaǵy kadet korpýsynda bilim alǵan jáne kelisimshartpen áskerı qyzmet atqaryp, Petropavl qalasynyń Jyldam qımyldaıtyn arnaıy jasaǵynda jumys istegen. Al 2020 jyldan beri E. Bazarbaev elordanyń polıtsııa sapynda qyzmet etip keledi.
«Polıtseı bolýdy bala kezimnen armandadym. Óıtkeni, bul marqum ákemniń mamandyǵy edi, kishkentaı kezimde onyń polıtseı formasymen júretini esimde qalypty. Ákemdi úlgi tutyp, osy mamandyqty tańdadym. Atam da – Uly Otan soǵysynyń ardageri, aǵa leıtenant shenimen soǵystan oralǵan. Týǵan aǵam – áskerı qyzmetshi. Sondyqtan, 7 mamyrdy otabsylyq merekemiz deýge bolady», - dedi E. Bazarbaev agenttik tilshisine bergen suhbatynda.
Jumys barysynda jyldam qımyldaıtyn jasaq túrli qylmystyń jolyn kesýge, qaýipti qylmyskerlerdi ustaýǵa jiberiledi. Odan bólek, Erlan Bazarbaev AQSh-tyń jedel medıtsınalyq tehnıkter qaýymdastyǵynyń kýrsynan ótip, zardap shekkenderge jedel járdem kórsetý boıynsha nusqaýshy atanǵan.
Qazirgi ýaqytta Erlan Bazarbaev jas áskerılerdi medıtsınalyq daıyndyq, jedel járdem kórsetý, atys, pyshaq aıqasy, parashıýtten sekirý jáne sýǵa súńgý boıynsha oqytady. 2017 jyldan beri praktıkalyq atýmen aınalysyp, Qazaqstannyń da, Astananyń da chempıony atanǵan.
«Praktıkalyq oqý atý sportymen Qazaqstannyń barlyq áskerı mindettileri, arnaıy jasaqtary aınalysady. Bul atý áskerıler úshin óte paıdaly, óıtkeni dáldikti, jyldamdyqty, az ýaqytta nysanaǵa dál tıip, oqjatardy qaıta qýattaý qasıetterin ushaıtyn sport. Sporttyq jáne jaýyngerlik daǵdylar damıdy, turý, jatý, tizerleý syndy ár túrli pozıtsııalarda oq atýdy, únemi qozǵalysta bolýdy, eki qolmen de birdeı tapansha ustaýdy shyńdaı túsedi. Óıtkeni soǵys jaǵdaıynda sarbaz qaı ıyqqa jaraqat alsa da, kez kelgen qolymen qarý ustaı alýy kerek. Elimizde bul sportty damytýda kúsh-jigerin aıamaǵan azamattar bar. Olar – Qazaqstandaǵy Praktıkalyq atý qaýymdastyǵynyń prezıdenti Narıman Mamatuly Ákimnııazov, Praktıkalyq atý boıynsha Qazaqstannyń bas bapkeri Zańǵar Ádiluly Álıev, QR ІІM otstavkadaǵy polkovnıgi Serik Muqan-Mádıuly Omarov, árıne bizdi jetelep, qarýdyń qyr-syryn úıretkeni úshin úlken alǵysymdy bildiremin», - dep túsindirdi maman.
Praktıkalyq oqý atýda árbir saıysqa úlken daıyndyqty talap etedi. Belsendi jattyǵýlar jasalady, bastapqyda qarýdy durys ustaý, dáldeý, myltyq tartpasyn úırený men tynys alýdy retteý úshin qarý oqsyz atylady.
«ıAǵnı munda qarýdy shyǵaryp jaı ǵana shúrippeni basý múmkin emes. Nysanaǵa jyldam ári dáldikpen tıip, kelesi nysanaǵa jetip, ony da qulatý úshin arnaıy qozǵalystar bar. Durys tamaqtaný da úlken ról atqarady. Biz jarystyń aldynda et jemeımiz, maıly taǵam jemeımiz. Óıtkeni jyldamdyqty arttyrý kerek. Qansha jerden nysanaǵa dóp tıseń de, sońǵy bolyp kelseń, upaı sanalmaıdy. Márege birinshi kelip, nysanaǵa oq tımese, ol da eseptelmeıdi. Sondyqtan, praktıkalyq atysta jyldamdyq pen dáldikti bólip-jarý qıyn», - deıdi Erlan Bazarbaev.
Onyń aıtýynsha, respýblıkalyq jarystarda báseke óte joǵary bolady, tapsyrmalar da jyldan-jylǵa qıyndap keledi.
«Oqý atý saıysy 12 jattyǵýdan turady. Árqaısysynyń nysanasy men tapsyrmalary ózgerip otyrady. Únemi aınalyp turatyn nysanalar, tasadan shyǵyp, birneshe sekýndtan soń qaıta jasyrynyp qalatyn nysanalar bolady, solardy dáldep atý kerek. Negizgi nysana qasynda aıyppuldyq nysana da bolady, oǵan oq tıip ketse – upaı azaıady. Jattyǵýlar da qıyndaı túsedi – qabyrǵanyń, terezeniń ar jaǵynan atatyn sátter de bolady, túrli kedergiler qoıylady. Osyndaı qıyn sportqa qazaq ulandarynyń ıkemi bar dep tolyq senimmen aıta alamyn. Óıtkeni sadaqpen, myltyqpen oq atqan ata-babalarymyzdyń mergendik qabileti jalǵasyp keledi», - deıdi Erlan Bazarbaev.
Qazaqstannyń barlyq aımaǵynda praktıkalyq oqý atý boıynsha ókildikter jumys isteıdi. Almaty jáne Aqtóbe qalalarynda oq atýdan aýqymdy jarystar ótkizýge múmkindik beretin úlken bazalar qalyptasqan. Sondaı-aq, Astana qalasy, Memlekettik kúzet qyzmeti, Almaty, Petropavl, Pavlodar qalalary praktıkalyq oq atýda jaqsy nátıje kórsetip júr. Qarýdy serik etken kásibı mamandardy Otan qorǵaýshylar kúnimen shyn júrekten quttyqtaımyz!
