Tapansha ustaǵan vıdeony jelide jarııalaǵan túrkistandyqqa eskertý jasaldy

TÚRKІSTAN. QazAqparat – Túrkistan oblysy Polıtsııa departamentiniń qyzmetkerleri áleýmettik jelilerge monıtorıng júrgizý kezinde «Instagram» qoldanýshylarynyń biriniń paraqshasynda jarııalanǵan beınejazbaǵa nazar aýdardy. Onda jas jigit qolyna eki birdeı tapanshany ustap, boǵaýyz sózderdi aıtqan. Sondaı-aq beınejazbada basqa da azamattardyń daýystary estiledi. Bul týraly QazAqparat Polıtsııa departamentine silteme jasap habarlaıdy.

Polıtsııa qyzmetkerleri atalǵan jazba boıynsha jedel izdestirý jumystaryn bastap ketti. Tólebı aýdandyq polıtsııa bólimi krımınaldyq polıtsııa bólimshesiniń qyzmetkerleri beınejazbany túsirgen jigitterdiń Tólebı aýdany Leńgir qalasynyń jergilikti turǵyndary ekenin anyqtady. Olar oıynshyq tapanshany ustap, «VAZ 21014» markaly kóliginiń artqy jaǵynda turyp beınejazbany túsirgen. Sodan soń jelidegi jeke paraqshasyna jarııalaǵan.

Polıtsııa qyzmetkerleri 3 jigitke de túsindirý jumystaryn júrgizip, aldaǵy ýaqytta mundaı jaǵdaı kezekti ret qaıtalanbasy úshin ýádelerin aldy. Sonymen qatar jergilikti turǵynnyń paraqshasyndaǵy atalmysh beınejazba óshirildi.

«2021 jyly aqpan aıynda jelide taralǵan beınejazba boıynsha keshirim suraımyn. Ondaǵy tapansha qarý emes, oıynshyq. Biz bul beınejazbany qylmysqa shaqyrý men nasıhattaý maqsatynda emes, dostardyń arasynda ázil úshin túsirgen bolatynbyz...»,- dep aqtaldy 3 jigit.