«Tapa» taıfýny Qytaıdyń Gýandýn provıntsııasynyń jaǵalaýyna jetti

ASTANA. KAZINFORM — Bıylǵy esep boıynsha 16-shy «Tapa» taıfýny dúısenbi kúni tańerteń Qytaıdyń ońtústigindegi Gýandýn provıntsııasynyń jaǵalaýyna jetti, dep habarlaıdy Qytaıdyń ortalyq meteorologııalyq qyzmeti.

Sınoptıkterdiń málimetinshe, taıfýn kezinde qurlyqtaǵy jeldiń jyldamdyǵy sekýndyna 30 metrge jetken.

8-9 qyrkúıekte provıntsııanyń ortalyq jáne ońtústik oblystarynda nóser jaýyn jaýady, ońtústik-batystyń keıbir aýdanynda jaýyn-shashyn mólsheri 250-280 mıllımetrge jetýi múmkin.

Aımaqta aýa raıynyń qolaısyzdyǵyna baılanysty mektepter jabylyp, poıyzdar qozǵalysy, parom qatynasy toqtatyldy. Bılik turǵyndardy qaýipti aımaqtardan evakýatsııalap jatyr.

Boljam boıynsha, Tapa soltústik-batysqa qaraı shamamen 20 km/saǵ jyldamdyqpen jyljyp, birte-birte kúshin joǵaltady.

Buǵan deıin Haınannyń taıfýnǵa daıyndalyp jatqanyn jazǵan bolatynbyz.