Tańjaryq oqýlarynyń jeńimpazdary anyqtaldy
ALMATY. QazAqparat - Almatyda Qazaq handyǵynyń 550 jyldyǵyna oraılastyrylǵan ІІ Tańjaryq oqýlarynyń jeńimpazdary anyqtaldy, dep habarlaıdy QazAqparat tilshisi Qazaq memlekettik qyzdar pedagogıkalyq ýnıversıtetiniń baspasóz qyzmetine silteme jasaı otyryp.
Atalmysh sharanyń uıymdastyrýshysy, jobanyń avtory Tursynbaı Dáýitulynyń aıtýynsha baıqaýǵa qalanyń 8 oqý ornynan 50-den asa úmitker qatysyp, onyń 15-i irikteýden ótken.
Bas júldeni Qazaq memlekettik Qyzdar pedagogıkalyq ýnıversıtetiniń 2-kýrs stýdenti Úmit Ońlasyn jeńip aldy. І oryndy Abaı atyndaǵy Qazaq Ulttyq pedagogıkalyq ýnıversıtetiniń 1-kýrs stýdenti Saltanat Ánapııaeva ıelendi. Ekinshi orynǵa Qazaq memlekettik qyzdar pedagogıkalyq ýnıversıtetiniń 2-kýrs stýdenti Gúlim Sadyrbekova men osy oqý ornynyń 1-kýrs stýdenti Aıjan Meldebek taban tiredi. Úshinshi oryndy Abaı atyndaǵy Qazaq Ulttyq pedagogıkalyq ýnıversıtetiniń 3-kýrs stýdenti Rınat Sarybala, Súleımen Demırel ýnıversıtetiniń 3-kýrs stýdenti Altynbek Ibragımov, Qazaq memlekettik qyzdar pedagogıkalyq ýnıversıtetiniń 1-kýrs stýdenti Aıdana Nurdan úsheýi ózara bólisti. Barlyq jeńimpazdar qarjylaı demeýshilik kórsetken «Halyqaralyq Tańjaryq zertteý» qoǵamdyq qorynyń aqshalaı syılyqtarymen marapattaldy. Budan ózge taǵaıyndalǵan «Kódek Maralbaıuly» men «Dosper Saýryquly» atyndaǵy arnaıy syılyqtyń ıegerleri anyqtaldy. Oǵan Qyzdar ýnıversıtetiniń 1-kýrs stýdentteri Qamajaı Erkebaeva men Mereılim Myrzabek laıyq dep tanyldy.
Shara aldymen «Tańjaryq tańdamaly shyǵarmalary» degen atpen bıyl «Mereı» baspasynan 2000 danamen jaryq kórgen daýylpaz aqyn Tańjaryq Joldyulynyń óleńderi, tolǵaýlary, dastandary men tańdaýly shyǵarmalary engen kitaptyń tusaýkeserimen jáne aıtysker aqyn arýlarymyz Arzygúl Qaıyńbaıqyzy men Zýra Shaıdymuratqyzynyń jyr shashýymen ashyldy.
Shara barysynda sonymen qatar, Tańjaryq murasyn zerttep, nasıhattaýǵa úles qosyp júrgen bes azamat: Abaı atyndaǵy Qazaq Ulttyq pedagogıkalyq ýnıversıtetiniń professory Temirhan Tebegenov, Qytaı memlekettik syılyǵynyń ıegeri, mádenıet salasynyń eńbek sińirgen qaıratkeri, «Halyqaralyq Tańjaryq zertteý» qoǵamdyq qorynyń tóraǵasy, jazýshy Tursynáli Ryskeldıev, QHR Shynjań halyq radıosynyń ardager qyzmetkeri Jibek Bazarbaıqyzy, Qazaq radıosynyń qyzmetkeri, aqyn, jýrnalıst - Baqyt Jaǵyparuly, Qazaqstan Respýblıkasynyń mádenıet qaıratkeri, Respýblıkalyq, halyqaralyq ánshiler baıqaýynyń júldegeri, ánshi Nurjan Janpeıisov Qyzdar ýnıversıtetiniń Alǵys hattarymen marapattaldy.
Joǵary deńgeıde ótken kesh shaǵyn kontserttik baǵdarlamamen aıaqtaldy. Onda óner kórsetken ánshi Nurjan Janpeıisov Tańjaryq Joldyulynyń el aýzynda kópten aıtylmaı júrgen «Aqyn syry» atty tolǵaýyn oryndasa, «Kúmis kómeı-jez tańdaı» ánshiler konkýrsynyń bas júldegeri, ánshi Sáýlejan Tahzııauly «Qos jeńge» ánin, Qytaı Halyq Respýblıkasynyń ártisi Baqyt Ásenqyzy «Saǵynysh» ánin naqyshyna keltire oryndap, kesh ajaryn asha tústi. Sonymen birge jas ánshiler de Joldyulynyń óleńderin sharyqtata oryndap, aqyn murasyn nasıhattaýǵa úles qosty.
Osylaısha, abaqtydan azattyqqa shyǵyp, aqtalǵan Alash arysynyń asyl armany táýelsiz Qazaq eliniń sahnasynda taǵy bir márte sátti oryndalyp, rýhy kóterilip, ataǵy aspandaı tústi. Qyzdar ýnıversıtetinde óris alǵan maǵynaly da, mándi óner toıy aldaǵy ýaqytta da jalǵasyn tabady. Ultyn súıer urpaq barda bul ıgi qadam eshqashan umytylmaq emes, aqyn murasy esh joǵalmaq emes.
Búginde aqynnyń 130 óleń-tolǵaýy, 12 qıssa-dastany, 6 aıtysy, 4-5 áni jaryq kórdi. Aqyn shyǵarmalary jyl ótken saıyn tolyǵa túsýde.
Aqyn atynda týǵan jerinde eńbekteri, muralary, paıdalanǵan zattary saqtalǵan murajaı bar. 2009 jyly 23 jeltoqsanda qalalyq máslıhattyń sheshimimen Astana qalasy kósheleriniń birine Tańjaryq Joldyulynyń esimi berilgen.
