Tanzanııalyq qazyna izdeýshi bir túnde mıllıonerge aınaldy
DODOMA. QazAqparat – Tanzanııalyq qazyna izdeýshi eki úlken jáne baǵaly tanzanıt tasyn tapqannan keıin bir tún ishinde mıllıonerge aınaldy, dep habarlaıdy QazAqparat agenttigi BBC-ge silteme jasap.
Sanınıý Laızer eldiń Taý-ken qazý ónerkásibi mınıstrliginen jalpy salmaǵy 15 keli tanzanıtterdi tapqany úshin 2,4 mln fýnt sterlıng ($3,4 mln) aldy.
«Erteń saýyq keshi bolady», - deıdi Laızer myrza.
El prezıdenti Djon Magýfýlıdiń ózi Laızer myrzaǵa habarlasyp, erekshe tabysymen quttyqtaǵan.
52 jastaǵy Sanınıý Laızerdiń tórt áıeli, 30-dan asa balasy bar. Ol saýyq keshin uıymdastyrý úshin sıyr soıatynyn aıtty.
Laızer bolashaqqa josparyn da bólisti. Ol Manıardaǵy týǵan jerine ınvestıtsııa quıǵysy keledi.
«Men saýda ortalyǵy men mektep ashqym keledi. Mektep meniń úıimniń janynda bolady. Ol jaqta balalaryn mektepke aparýǵa jaǵdaıy jetpeıtin kedeı adamdar kóp».
Onyń aıtýynsha, bul oqıǵa onyń ómir saltyn ózgertpeıdi, ol ary qaraı da óziniń 2000 sıyryn baǵa beredi.
Baǵaly tastyń ereksheligi - túsiniń ártúrliliginde. Onyń jasyl, qyzyl, kúlgin jáne kók túsi bolady. Ol óte sırek kezdesetindikten baǵaly jáne móldir, túsi qanyq bolǵan saıyn onyń quny da joǵary bolady.
Laızer sekildi altyn izdeýshiler tanzanıtti izdeýge memlekettik lıtsenzııa alady. Soǵan qaramastan elde tanzanıtti zańsyz jolmen izdeý keń taraǵan. Ásirese, iri kompanııalarǵa tıesili shahta mańynda osyndaı oqıǵalar jıi bolady.
2017 jyly prezıdent Magýfýlı áskerılerge álemdegi tanzanıt bar jalǵyz meken sanalatyn Manıardaǵy Merelanı ken ornynyń aınalasyna 24 shaqyrymdyq qabyrǵa soǵýdy tapsyrdy.
Bir jyldan keıin úkimet taý-ken óndirisi sektorynda kiristiń artqanyn habarlap, ony qabyrǵa ornatýmen baılanystyrdy.
