Tanzanııadaǵy prezıdenttik saılaýdan keıingi tártipsizdik: júzdegen adam qaza tapty

ASTANA. KAZINFORM — Tanzanııada prezıdenttik saılaýdan keıingi úsh kúndik narazylyqta júzdegen adam qaza tapty. Bul týraly eldiń basty oppozıtsııalyq partııasy málimdedi, dep habarlaıdy VVS.

Oppozıtsııalyq «Chadema» partııasynyń ókili AFP agenttigine, qaýipsizdik kúshterimen qaqtyǵysta 700-ge jýyq adam kóz jumǵanyn aıtty. Tanzanııadaǵy dıplomatııalyq derekkóz agenttikke 500 adamnyń qaza tapqandyǵyna senimdi dálelder bar ekenin jetkizdi.

Osyǵan qarap, qaıtys bolǵandardyń sany ártúrli ekenin ańǵarýǵa bolady. Buǵan sebep - el boıynsha ınternettiń sóndirilýi. Ǵalamtordyń óshirilýi adam sanyn esepteýdi qıyndatty.

Úkimet zorlyq-zombylyqty azaıtýǵa tyrysyp jatyr. Bılik tártipsizdikterdi basý úshin komendanttyq saǵatty uzartty.

BUU Tanzanııanyń qaýipsizdik kúshterin shamadan tys kúsh qoldanýdan bas tartýǵa shaqyrdy. Al Ulybrıtanııa, Kanada jáne Norvegııanyń Syrtqy ister mınıstrleri birlesken málimdeme jasap, bılikti múmkindiginshe ustamdy bolýǵa jáne sóz bostandyǵyn qurmetteýge shaqyrdy.

Eldegi týrıster áýejaıda qalyp qoıdy, óıtkeni mundaǵy narazylyq pen ınternettiń óshýi reısterdi keshiktiredi.

Sherýler negizinen ádiletsiz saılaýǵa narazylyq bildirgen jastar arasynda ótip jatyr.

Narazy halyq bılikti oppozıtsııa basshylaryn qýdalaý arqyly demokratııaǵa nuqsan keltirdi dep aıyptaıdy. Opasyzdyq jasady degen aıyppen qamaýda otyrǵan Týndý Lıssý men tehnıkalyq negizde saılaýdan shyǵarylǵan Lýhaga Mpına qazirgi prezıdent Samııa Sýlýhý Hasannyń jeńiske jetý múmkindigin arttyrdy.

Saılaýdyń nátıjesi senbi kúni shyǵady dep josparlanǵan. Alaıda qazirgi prezıdent Samııa Sýlýhý Hasan jeńimpaz dep jarııalandy. Ol 2021 jyly burynǵy prezıdent Djon Magýfýlı qaıtys bolǵannan keıin bılikke kelip, Tanzanııanyń alǵashqy áıel kóshbasshysy boldy.

Samııa aldymen saıası qýǵyn-súrgindi jeńildetken basshy retinde tanyldy. Keıin onyń úkimeti tutqyndaý jáne urlaý arqyly qarsylastaryn qýdalady dep aıyptala bastady.

Aıta keteıik, Kot-d’Ivýarda ótken prezıdenttik saılaýda Alassan Ýattara jeńiske jetti.