Tanzanııada avtobýs pen júk kóligi soqtyǵysyp, 28 adam qaza tapty
ASTANA. KAZINFORM – Tanzanııanyń shyǵysyndaǵy Morogoro aımaǵynda jolaýshylar avtobýsy men aǵash tıegen júk kóligi betpe-bet soqtyǵysyp, keminde 28 adam qaza tapty. Bul aqparatty jergilikti órt sóndirý jáne qutqarý qyzmeti rastady, dep habarlaıdy Sınhýa agenttigi.
Morogoro óńirlik órt sóndirý jáne qutqarý qyzmeti basshysynyń mindetin atqarýshy Djozef Mvasabedjanyń málimetinshe, jol apaty beısenbige qaraǵan túni Morogoro - Dar-es-Salam tasjolynyń Mkambaranı eldi mekeni mańyndaǵy bóliginde bolǵan.
Aǵash tıegen júk kóligi Dar-es-Salam qalasynan eldiń ońtústigindegi Mbeıa qalasyna baǵyt alǵan jolaýshylar avtobýsymen soqtyǵysqan. Qatty soqqydan keıin avtobýs órtenip, tolyǵymen janyp ketken.
– Jol apatyna júk kóliginiń júrgizýshisi kináli. Onyń jeke basy ázirge anyqtalǵan joq. Júrgizýshi qaýipsizdik sharalaryn saqtamaı, aldyńǵy kólikti basyp ozýǵa árekettengen. Sonyń saldarynan júk kóligi qarsy baǵytta kele jatqan jolaýshylar avtobýsymen betpe-bet soqtyǵysqan, – dedi Djozef Mvasabedja.
Qutqarý qyzmetiniń málimetinshe, qaıǵyly oqıǵa saldarynan keminde 28 adam kóz jumǵan.
Aıta keteıik, buǵan deıin Shvetsııada tasjolda eki qabatty avtobýs aýdarylyp, zardap shekkender bar ekeni habarlanǵan bolatyn.
