Tanzanııa prezıdenti Djon Magýfýlı qaıtys boldy
DAR-ES-SALAM. QazAqparat – Tanzanııa prezıdenti Djon Magýfýlı 61 jasyna qaraǵan shaǵynda Dar-es-Salamnyń aýrýhanasynda qaıtys boldy, dep habarlaıdy QazAqparat CNN-ge silteme jasap.
«Prezıdent Djon Magýfýlı 10 jyldan astam ýaqyt boıy kúresken júrek aýrýynan qaıtys boldy», – dedi Tanzanııa prezıdentiniń mindetin atqarýshy Samıa Sýlýhý Hasan. Ol prezıdenttiń jeksenbiden bastap Mızena aýrýhanasynda emdelgenin aıtty. Hasan 14 kúndik ulttyq aza tutýdy jarııalady
Prezıdenttiń qaıtys bolǵany týraly belgili bolǵan kezde oppozıtsııa jetekshisi Zıtto Kabve Magýfýlıdiń otbasyna kóńil aıtty. Ol sondaı-aq Hasanǵa «izgi nıetin bildirip, batyldyq pen shydamdylyq» tiledi.
Ulybrıtanııa Premer-mınıstri Borıs Djonson Magýfýlıdiń qaıtys bolýyna baılanysty kóńil aıtqan alǵashqy álemdik kóshbasshylardyń biri boldy.
Pandemııa bastalǵan shaqta Magýfýlı Tanzanııadaǵy koronavırýstyń bar ekendigine kúmán keltirip, aýrýdan qorǵaný úshin duǵa etý kerektigi týraly aıtty.
Maýsym aıynda ol eliniń koronavırýsty «Qudaıdyń raqymymen» jeńgenin aıtty. Sondaı-aq sheteldik Covid-19 vaktsınalarynyń qaýipsizdigine kúmán keltirdi jáne emdeý úshin emdik shópter men ıngalıatsııalardy qoldanýdy usynyp, elde eshqandaı vaktsına jasaýdy josparlamady.
Tanzanııa 2020 jyldyń sáýirinen bastap Covid-19 jaǵdaılary týraly málimet bergen joq. Tek Ótken aıda AQSh-tyń Dar-es-Salamdaǵy elshiligi qańtar aıynan bastap Covid-19 oqıǵalarynyń sany artyp kele jatqanyn eskertken bolatyn.
