Tanysynyń atynan 1 mln teńge nesıe alǵan semeılik ustaldy

SEMEI. QazAqparat – Semeı qalasynda tanysynyń atyna 1 mln teńge alǵan er adam ustaldy, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, polıtsııaǵa qońyraý shalǵan azamat óz atyna tanysynyń nesıe rásimdegenin aıtyp shaǵymdandy.

Belgili bolǵandaı, jábirlenýshiniń jeke qujattaryn paıdalanǵan 24 jastaǵy er adam bankterdiń birinen 1 mln teńge mólsherinde nesıe alǵan.

«Jedel-izdestirý sharalaryn júrgizgen tártip saqshylary buryn sottalmaǵan, jumyssyz jergilikti turǵyndy ustady. Atalǵan fakti boıynsha oǵan QR QK-niń 190-baby 1-bóligine sáıkes sotqa deıingi tergeý amaldary bastaldy», - delingen habarlamada.

Vedomstvo ókilderiniń dereginshe, polıtsııa qyzmetkerlerimen júrgizilip jatqan alaıaqtyq faktileriniń aldyn alý sharalaryna qaramastan, jurt arasynda áli kúnge deıin beıtanys adamdarǵa senip, ańǵaldyq tanytyp jatqandar az emes.

Sondyqtan áleýmettik jeliler men messendjerler arqyly jeke basty kýálandyratyn qujattardy eshkimge jibermeý qajet.