Tanysynan 2,5 mln teńge aqsha bopsalaǵan 22 jastaǵy kókshetaýlyq ustaldy
KÓKShETAÝ. QazAqparat - Tanys áıelden jarty jyl boıy 2,5 mıllıon teńge aqsha bopsalap kelgen Kókshetaý qalasynyń 22 jastaǵy turǵyny ustaldy, dep habarlaıdy QazAqparat tilshisi.
Oblystyq polıtsııa departamenti baspasóz qyzmetiniń málimetinshe, mamyrdyń 30-da qalalyq PB kezekshilik bólimine iri kólemde bopsalaý týraly aryz túsken.
«Óńir turǵyny 2020 jyldyń kúzinen bastap 2021 jyldyń mamyryna deıin tanysynan 2,5 mln teńge kóleminde aqsha qarajatyn bopsalaǵany anyqtaldy. Jábirlenýshi bul aqshany qaskúnemge jáne onyń dostarynyń bank kartalaryna jiberip otyrǵan. Osy boıynsha departamenttiń tergeý basqarmasy Qylmystyq kodekstiń 194 baby «bopsalaýshylyq» boıynsha sotqa deıingi tergeýdi bastady», - dep túsindirdi vedomstvodan.
Jedel-izdestirý is-sharalaryn júrgizý barysynda Kókshetaý qalasynyń aýmaǵynda krımınaldyq polıtsııa basqarmasynyń qyzmetkerleri osy qylmysqa kúdikti retinde oblys ortalyǵynyń 22 jastaǵy turǵynyn ustady.
Belgili bolǵandaı, kúdikti birneshe aı boıy qorqytý jáne bopsalaý arqyly jábirlenýshini áshkereleıtin aqparatty taratpaǵany úshin áıelden aqsha talap etken.
