Tanysyna nesıe rásimdetip, aqshany qaltasyna basqan túrkistandyq ustaldy
ASTANA. QazAqparat – Túrkistandyq polıtseıler ózgeniń atynan taýar nesıesin rásimdegen alaıaqty ustady. Bul týraly QR Іshki ister mınıstrligi baspasóz qyzmetiniń ókili Shuǵyla Turlybek málim etti, dep habarlaıdy QazAqparat tilshisi.
«Túrkistan qalalyq polıtsııa basqarmasyna jergilikti turǵyn aryzdandy. Onyń atynan belgisiz bireý 300 000 teńgeniń taýaryn nesıege alǵan. Jábirlenýshi áıel nesıesi baryn bir aıdan keıin bankten habarlama kelgen kezde bilip, jergilikti polıtseılerden jaǵdaıdy anyqtaýǵa kómektesýin suraǵan», - dedi ol mınıstrliktiń baspasóz qyzmeti alańynda ótken brıfıngte.
Onyń dereginshe, jedel-izdestirý is-sharalarynyń nátıjesinde polıtsııa qyzmetkerleri kúdiktini anyqtap, kóshede ustady. Alaıaqtyq jasaǵan er adam jergilikti turǵyn jáne jábirlenýshiniń tanysy bolyp shyqty.
«Ol jábirlenýshi áıeldi taýarlyq nesıe alyp, ony zeınetaqy qoryndaǵy aqshamen óteýge bolatynyna sendirgen jáne nesıe rásimdeýge ózi kómektesitinin aıtqan. Jábirlenýshiniń atynan alaıaq bankke suraý jiberip, maquldaý alǵan soń, aqshany óz shotyna aýdaryp alǵan. Qazirgi ýaqytta sotqa deıingi tergeý amaldary júrgizilýde. Kúdiktiniń basqa da osyndaı alaıaqtyqqa qatysy bar-joǵy anyqtalýda», - dedi Shuǵyla Turlybek.
