Tanysyn pyshaqtady dep kúdikke ilingen Lısakovsk turǵyny terezeden sekirip, qaza tapty

QOSTANAI. QazAqparat – Tanysyn pyshaqtady dep kúdikke ilingen Lısakovsk turǵyny úıine tártip saqshylary kelgen kezde 8-qabattyń terezesinen sekirip, qaza tapty, dep habarlaıdy QazAqparat tilshisi polıtsııa departamentiniń baspasóz qyzmetine siltememen.

«27 mamyrda buǵan deıin sottalǵan 30 jastaǵy jergilikti turǵyn urys kezinde tanysyn pyshaqtaǵan. Zardap shegýshi aýrýhanaǵa jatqyzyldy. Polıtsııa qyzmetkerleri kúdikti men onyń turatyn jerin anyqtady. Polıtseıler onyń mekenjaıyna barǵan kezde kúdikti 8-qabattyń terezesinen sekirip ketken. Alǵan jaraqatynan qaza tapty», - dep málim etti Qostanaı oblysy polıtsııa departamentinen.

Atalǵan fakti boıynsha QR QK 106 jáne 105-baptary boıynsha sotqa deıingi tergeý bastaldy.

«Oqıǵaǵa kýáger bolǵan kúdiktiniń anasy polıtseılerge ulynyń buǵan deıin sýıtsıdtik áreketin baıqaǵanyn málimdedi. Sýıtsıdtik áreketi týraly birneshe ret aıtqan», - dep túsindirdi departamentten.

Qazir tergeý júrip jatyr. Sáıkes saraptama taǵaıyndaldy.