Tanysyn «piship» tastaǵan kelinshek isi: Astana soty málimettiń taralýyn tekserýde
ASTANA. QazAqparat - Astana qalalyq soty óz tanysynyń jynys múshesin kesip tastamaq bolǵan kelinshektiń isine qatysty málimetterdiń jarııa bolýyna baılanysty qyzmettik tekseris júrgizdi. Bul týraly QazAqparat tilshisine telefon arqyly elordalyq sottan habarlady.
«Atalǵan qujattardyń taralýyna sot qyzmetkerleriniń esh qatysy joq», - dep habarlady Astana qalalyq sotynyń baspasóz qyzmetinen.
Aıta keteıik, buǵan deıin áleýmettik jelide 36 jastaǵy kelinshek óz súıiktisin jynys múshesinen aıyrǵysy kelgeni týraly aqparat taraǵan bolatyn.
Jeliler men messendjerlerde Astana qalasy Esil aýdandyq №2 sotynyń 2018 jylǵy 24 qańtardaǵy qaýlysy retinde sıpattalǵan foto paıda boldy. Ondaǵy derekterge súıensek, súıiktisinen ózge qyzben kóńil qosty dep kúdiktengen 1981 jyly týǵan áıel, ony ıntımdik oıyn oınaýǵa shaqyryp, keıinnen aıaq-qolyn baılaǵan. Sosyn dári bergen. Aldyn ala boljam boıynsha, uıyqtatatyn preparat.
Sodan soń bar ókpe-renishin aıtyp, er adamnyń jynys múshesine tilikter jasaı bastaǵan. «Jazalaý» barysynda súıiktisiniń azabyn jeńildetý úshin áıel onyń shabyna 3 ret Ledokoın ekken. Keıin qansyraǵan er adamdy óz kóligimen aýrýhanaǵa alyp barǵan.
