Tanymaıtyn qyzdy alyp qashpaq bolǵan aqtóbeliktiń isi sotta qaralyp jatyr
AQTÓBE. QazAqparat - Aqtóbede sóz baılasqan qalyńdyǵymen kelispeı qalyp, bazar mańynan kórip qalǵan boıjetkendi alyp qashpaq bolǵan Sanat Ómirzaqovqa qatysty sot ótip jatyr, dep habarlaıdy QazAqparat tilshisi.
Aqtóbede «qyz alyp qashý » oqıǵasynyń sońy sotqa jetti. Buǵan deıin habarlaǵanymyzdaı, osy oqıǵaǵa baılanysty Qylmystyq kodekstiń «Adam urlaý» baby boıynsha is qozǵaldy. Búgin osy iske qatysty sot otyrysy bastaldy.
«Sanat Ómirzaqov 2013 jyldan bastap júrgen qyzy ıakı bolashaq qalyńdyǵymen sóz baılasqan. Biraq qyzdyń ata-anasy ol ekeýiniń otbasy qurýyna qarsy boldy. Osyǵan baılanysty ol qalyńdyqty alyp qashpaq bolady. Qalyńdyq ta «alyp qashýǵa» kelisim bergen eken. Osylaısha Sanat Ómirzaqov qalaǵa kelip, súıiktisine habarlasady. Alaıda Amanbekqyzy «kishkentaı baýyrlarymnyń qasynda otyrmyn, olardy qaraıtyn eshkim joq» dep jaýap qaıtarǵan. Sol kezde ashýǵa býlyqqan «týǵan-týystarymnyń, aǵaıymnyń aldynda uıatqa qaldym» degen Sanat Ómirzaqov dosy Aldabergen Jumajanovpen kezdesip, ekeýi syra ishedi. Otyrys barysynda "qyz alyp qashý" týraly oıyn iske asyrmaq bolyp, aýylǵa taksı jaldap alady", - dedi aıyptaý qorytyndysyn oqyǵan prokýror. Onyń sózine qaraǵanda, jigitter taksımen Aqtóbe qalasyndaǵy Araı-1 bazaryna kelip, sol jerde kezdesken 20 jastaǵy qyzdy kórip, «qalyńdyq etip alýǵa keletin qyz eken» degen oıǵa keledi. Osydan soń Sanat Ómirzaqov qyzdyń belinen ustap, mashınaǵa kúshtep salmaq bolady. Alaıda, sol kezde boıjetkendi bazardyń kúzetshisi qutqaryp qalǵan.
Aıta keteıik, sot otyrysy kezinde aıyptalýshy Sanat Ómirzaqov bar kinány moıyndady. Prokýror Asylhan Sársenbaevtyń aıtýynsha, sot-medıtsınalyq saraptama kezinde 20 jastaǵy jábirlenýshiniń eki ıyǵy qantalaǵan, densaýlyqqa jeńil zııan keltirgen degen sheshim shyǵarylǵan. Sot otyrysy jalǵasyp jatyr.
