Tanymal jýrnalıst, jazýshy Jarylqap Beısenbaıuly «Eńbek ardageri» tósbelgisimen marapattaldy
Bul týraly mınıstr óziniń Facebook paraqshasynda jazdy, dep habarlaıdy QazAqparat.
«Búgin qazaq jýrnalıstıkasynda aıryqsha qoltańbasy bar jampoz jýrnalıst, Sher-aǵa men Seıdahmet Berdiqulovtyń jolyn jalǵastyrǵan bilikti basshy, Shoqantanýǵa úlken úles qosqan zerdeli zertteýshi, ulttyń aıbaryna aınalǵan «Ana tili» basylymynyń alǵashqy basshysy Jarylǵap Beısenbaıulyn qabyldap, týǵan kúnimen quttyqtadym. Mınıstrliktiń «Eńbek ardageri» tósbelgisin tapsyryp, aǵamyzǵa zor densaýlyq tiledim! Jasaı berińiz, jaza berińiz, Jaqa!»,-dep jazdy mınıstr.
Jarylqap Beısenbaıuly Ońtústik Qazaqstan oblysy Otyrar aýdany Molyke Shoımanov aýylynda týǵan.
1969 jyly Qazaq memlekettik ýnıversıtetin bitirdi. 1969-1990 jyldary «Lenınshil jas» (qazirgi «Jas Alash») gazetinde ádebı qyzmetker, bólim meńgerýshisi, jaýapty hatshy bolyp istedi.
1990-1997 jyldary «Ana tili» gazetiniń tuńǵysh Bas redaktory qyzmetine taǵaıyndaldy. 1997 jyldyń sońynan - «Qazaq aqparat agenttigi» dırektorynyń orynbasary, 2002 jyly osy agenttik negizinen qurylǵan «QazAqparat» Ulttyq kompanııasy» AQ qazaq redaktsııasynyń bas redaktory boldy.
2014-2017 jyldar aralyǵynda «Mádenı mura» jýrnalynyń bas redaktory qyzmetin atqardy.
«Shoqan izimen» (1977), «Býyrqanǵan boıaýlar» (1981), «Ádep álemi» (1982), «Jasyn-taǵdyr jarqyly» (1987), «Qazaq shejiresi» (1994), «Arǵy túrikter aqıqatynyń izimen»(2006) atty derekti-tanymdyq, esse, zertteý kitaptarynyń, sondaı-aq «Shoqan» roman-essesiniń (2009) avtory.
Bul roman-esse kitaby 2015 jyly orysshaǵa aýdarylyp, onyń tanystyrylymy sol jyldyń sońynda Máskeý qalasyndaǵy Orys Geografııalyq qoǵamynyń shtab-páterinde ótti.
Sonymen birge 2015 jyly astanadaǵy Túrki akademııasynyń jobasy boıynsha «Ortalyq Azııadaǵy arǵytúrik sıpatty mádenıetter: etnotektik aspektiler» monografııasy jaryq kórdi.
Qazaqstan Jastar odaǵy syılyǵynyń ıegeri (1982).
