Tanymal jýrnalıst Janbolat Aýpbaev «ekinshi týǵan kúnin» toılap jatyr
ASTANA. QazAqparat - Ómirde týǵan kúnin jylyna eki ret toılaıtyn adamdar bolady. Solardyń biri tanymal jýrnalıst, qarymdy pýblıtsıst, kúni keshege deıin elimizdegi bas basylym - «Egemen Qazaqstan» respýblıkalyq jalpyulttyq gazetiniń bas redaktory bolǵan, búginde osy gazette Basqarma tóraǵasynyń keńesshisi qyzmetin atqaryp júrgen Janbolat Aýpbaev aǵamyz.
Keshe 65 deıtin asýǵa jetken qalamger aǵamyzǵa tól merekesimen elden buryn quttyqtaıyq dep qońyraý shalǵan bolatynbyz. Aman-sálemnen keıin «QazAqparat» HAA jarııalaıtyn kúntizbe deregi boıynsha jáne Ýıkıpedııada ol kisiniń týǵan kúni 24 jeltoqsan (24.12.1951 j.) dep kórsetilip turǵanyn, alaıda jýrnalıstik jaýapkershilikti umytpaı, «Egemen Qazaqstan» gazetiniń qyzmetkerleri týraly málimetter bazasyna suraý salǵanymyzda, ol jerde ol kisiniń týǵan kúni 2 maýsym (02.06.1951 j.) dep kórsetilip turǵanyn aıttyq. Eki derektiń qaısysy durys ekenin óz aýzynan bileıik dep habarlasyp turǵanymyzdy jetkizdik. Jaýap kóp kúttirmedi.
«Ekeýi de meniń týǵan kúnim, - dedi kúlip. - Ómirde jylyna týǵan kúndi eki ret toılaıtyn adamdar bolady ǵoı. Sonyń biri - menmin, qaraǵym».
Únsizdik. Men ol kisiniń sózin bólmeıin degen oımen irkilgen edim. Ony Aýpbaev aǵamyzdyń ishi sezdi me, uıaly telefonnyń arǵy jaǵyndaǵy jarqyn ún jalǵasa jóneldi: «Meniń bala kezimde adamdar qujat degen dúnıege asa mán bermese kerek. 1959 jyly jeti jastan asqanda mektepke baratyn boldym. Ákem kolhozda (Almaty oblysy Narynqol aýdany «Oktıabrdiń 40 jyldyǵy» atyndaǵy qolhoz - red.) usta edi. Men mektepke baratyn kezde ǵana týý týraly kýálik jasatqan ǵoı. Ózi bara almaıtyn bolǵan soń, aýdanǵa shopyryn jibergen. Shopyr baryp aýdandaǵylarǵa kýálikti jasap berińder degen. Týǵan kúnimdi jazatyn kezde ǵana baryp, sony suramaı shyǵyp ketkeni esine túsken. Ol kezde qazirgideı uıaly telefon joq qoı. Habarlasyp, bile qoıatyn. «Keıin bilip kel» degenge: «Usta maǵan ursady, qur qol qaıtpaımyn, qaıtsem de kýálikti alyp qaıtamyn», - dep, ol da kónbegen. Sodan orys áıelderdiń basy ábden qatyp, 2 maýsym kúni týǵan dep jazyp jiberipti. Sol kezde eger adamnyń týǵan kúni belgisiz bolsa, jyldyń ortasyna qoıady degen zań bar eken. Mine, osylaı meniń qujatymda týǵan kúnim basqa kúnmen jazylyp ketken», - dep baryp sózin aıaqtady.
Taǵy da az-kem áńgimeden keıin áriptes aǵamyzdy redaktsııa atynan kele jatqan «óz týǵan kúnimen» quttyqtap, zor densaýlyq, shyǵarmashylyq tabystar tiledik. Ol kisi de únsiz qalǵan joq.
«Áı, bala, senderge myń rahmet! Ádette basty qyzmetten ketken soń (Bas redaktor laýazymynan aýysýy - red.) ınternettegi málimetter de joǵalyp ketip jatady. Elep-eskerip jatqandaryńa myń alǵys», - dedi eljirep.
ANYQTAMA: Janbolat Álıhanuly Aýpbaev 1951 jyly 24 jeltoqsanda QHR-dyń Shyńjań ólkesindegi Qulja ýálaıatyna qarasty Tekes eldi mekeninde ómirge kelgen. S.M.Kırov atyndaǵy Qazaq memlekettik ýnıversıtetin (qazirgi Ál-Farabı atyndaǵy QazUÝ) bitirgen.
1974-1986 jyldary - «Lenınshil jas» respýbıkalyq jastar gazetinde tálimger, kishi ádebı qyzmetker, aǵa tilshi, bólim meńgerýshisi bolǵan.
1986-1991 jyldary - «Qazaqstan kommýnısi» jýrnalynyń jaýapty hatshysy bolǵan.
1991-1996 jyldary - «Halyq keńesi» gazeti bas redaktorynyń orynbasary bolǵan.
1996-1998 jyldary - «Aqıqat» jýrnaly bas redaktorynyń birinshi orynbasary.
1998-2003 jyldary «Egemen Qazaqstan» respýblıkalyq jalpyulttyq gazeti bas redaktorynyń orynbasary. 2003-2016 jyldary osy gazette bas redaktor bolǵan.
2016 jylǵy qarashadan bastap Basqarma tóraǵasynyń keńesshisi qyzmetine aýysty. Kóptegen tanymdyq-pýblıtsıstıkalyq kitaptardyń avtory. O.Súleımenovtiń, S.Sanbaevtyń shyǵarmalaryn qazaq tiline aýdardy, «Qajymuqan men Qajytaı», «Han táńiri» derekti kınofılmderiniń ádebı stsenarııleriniń avtory.
Maqalalary men ocherkteri respýblıkalyq basylymdarda úzbeı jarııalanyp keledi. Qazaqstan jazýshylar odaǵynyń múshesi, Qazaqstan jýrnalıster odaǵy syılyǵynyń, Qazaqstan Prezıdentiniń jýrnalıstıka salasyndaǵy syılyǵynyń jáne Qazaqstan jazýshylar odaǵynyń halyqaralyq «Alash» syılyǵynyń laýreaty.
