Tanymal jýrnalıst Baýyrjan Omarulynyń «Qaratereń valsi» atty jańa kitaby jaryq kórdi

Qalamgerdiń 2011 jyly jazǵan esseler men áleýmettik ápsanalary engen jınaq Almaty qalasyndaǵy «Arna-b» baspasynan shyǵyp otyr.

Kitaptyń negizgi keıipkerleri - áıgili Aral aımaǵynyń adamdary. Biraq darııa jaǵasyndaǵy qumdy aýyldyń hıkaıattary qazaq eliniń kez kelgen óńiriniń bolmysyn bederleı alady.

Shaǵyn kitapta avtordyń «Qaratereń valsi», «Asan men Úsen», «Qumdy aýyldyń kınosy», «Bozbala men boıjetken», «Altyn balyq» atty týyndylary toptastyrylǵan.

Osy shyǵarmalarǵa kóz júgirtken oqyrman ár adamnyń saǵynysh sezimin oıatatyn týǵan jerine, qyzyǵy men qýanyshy mol balalyq shaǵyna saıahat jasaǵandaı bolady.

Aýyl men adam, teńiz ben taǵdyr, sezim men saǵynysh, ómir men ıýmor - oqyrmanǵa usynylǵan pýblıtsıstik týyndylardyń taqyryptyq jáne mazmundyq jelileri. Avtor qaımaǵy buzylmaǵan qazaq aýylynyń tynys-tirshiligine ózgeshe qyrynan zer salady.

Jınaqta retrolyq sıpaty basym syrly sıýjetter men dáıekti detaldar arqyly órnektelgen oı-tujyrymdar jetkilikti.

Oqyrmanǵa oı salatyn kitaptyń tili - shuraıly, mazmuny - tereń.