Tanymal jýrnalıst áýlıeatalyq áriptesterimen jáne stýdenttermen kezdesti
TARAZ. QazAqparat – Jambyl oblysy ákimdigi ishki saıasat basqarmasynyń uıymdastyrýymen Tarazda «Qazaqstan» ulttyq telearnasynyń bas redaktory, belgili jýrnalıst, Qazaqstannyń eńbek sińirgen qaıratkeri Qaınar Oljaımen kezdesý ótti, dep habarlaıdy QazAqparat tilshisi.
M.H.Dýlatı atyndaǵy TarMÝ májilis zalynda ótken kezdesýde belgili jýrnalıst Qaınar Oljaı jýrnalıstıka mamandyǵynyń jáne fılologııa fakýltetiniń stýdentterimen júzdesip, erkin formatta áńgime-dúken qurdy. Basqosýdy oblys ákimdigi ishki saıasat basqarmasynyń basshysy Daýyl Beısenqulov ashyp, júrgizip otyrdy.
Kezdesý barysynda Qaınar Oljaı uzyn-sonar dáris oqýdan góri, úzik-úzik oılarymen bólisýdi jón kórgenin aıtty.
«Jýrnalıst eń aldymen qazaq tilin jetik meńgerýi kerek. Qazir kóp jýrnalıster til bilmeıdi, saýatsyz jazady. Jýrnalıst saýatsyz bolsa, búkil halyq saýatsyz bolady. Óıtkeni jýrnalıst qalaı sóılese, aýyldaǵy adam da solaı sóıleıdi. Osydan-aq baıqaı berińizder, ulttyń saýatty bolýy eń aldymen jýrnalıstiń saýatyna baılanysty. Osyny qaperden shyǵarmaǵan jón. Qasapshyǵa – pyshaq, jýrnalıske – sóz kerek. Sondyqtan sózdi tereń meńgergen jýrnalıst myqty maman bolyp qalyptasady», – dedi qazaq jýrnalıstıkasynyń metri Q.Oljaı.
Qurmetti qonaq qatysqan taǵy bir ıgi shara Sh.Ýálıhanov atyndaǵy oblystyq ámbebap-ǵylymı kitaphanada ótti. Belgili jýrnalıst, oblystyq máslıhattyń depýtaty Meırambek Tólepbergen moderatorlyq etken semınarǵa jergilikti BAQ ókilderi qatysty. Onda Qaınar Oljaı qazirgi jýrnalıstıkadaǵy jańashyldyqtarǵa toqtalyp, dástúrli jýrnalıstıka men blogerler básekesi qyzyp turǵanyn, jýrnalıst bilimdi bolsa blogerlerdi shań qaptyryp ketetinin aıtty.
«Men Qaltaı Muhamedjanovtan, Sherhan Murtazadan, Seıdahmet Berdiqulovtan sabaq aldym. Bilgenimdi jas jýrnalısterge úıretý – paryzym. Aqy alatyn jáne almaıtyn nárseń bolady. Aqy almaıtyn ol – paryzyń, aqy alatyn – eńbegiń. Eńbegim úshin úkimetten aılyq alamyn. Al sol toptaǵy sabaqtarym úshin aqy almaımyn. Ol – meniń paryzym», – dep aǵynan jaryldy jýrnalıst.
Kezdesý barysynda qonaqqa jergilikti jýrnalıster salmaqty saýaldaryn joldap, tuşymdy jaýap aldy. Parasatty pikirin, oramdy oılaryn ortaǵa salǵan qonaqqa zor alǵysyn jetkizdi.
