Tanymal jarnama saıttary arqyly joq taýardy satqan eki alaıaq ustaldy

PAVLODAR. QazAqparat - Pavlodardyń eki turǵyny «OLX» jáne «Kolesa KZ» saıttary arqyly Qazaqstan turǵyndaryn 15 mıllıon teńgege aldap ketken, dep habarlaıdy QazAqparat.

«Pavlodar qalasynyń buryn sottalǵan turǵyndary tanymal saıttarda joq taýardy satyp, 200-den astam qazaqstandyqty aldap soqqan», - dep habarlady Pavlodar oblystyq polıtsııa departamentiniń baspasóz qyzmetinen.

Oblystyń tártip saqshylary 24 jáne 27 jastaǵy eki er adamdy ustady.

«Olar «OLX», «Kolesa.KZ» saıttaryna joq taýarlardy (shóp, traktor, astyq, otyn) satý týraly jarnama salǵan. Bul rette olar telefon shalǵanda ózderin bank qyzmetkeri retinde kórsetip, sol arqyly búkil Qazaqstan boıynsha ınternet-alaıaqtyq jasaǵan», - dep tolyqtyrdy vedomstvodan.

Olardan aldanǵan turǵyndar ortasha eseppen 10 myńnan 500 myń teńgege deıingi kólemde aldyn ala tólem aýdarǵan. Tólem ishimdik ishken, úı-kúıi joq úshinshi adamdardyń, esepshotyna túsirilgen. Osydan keıin «satýshymen» baılanys úzilgen.

«Barlyq faktiler QR Qylmystyq kodeksi 190-babynyń 2-bólimi (alaıaqtyq) boıynsha sotqa deıingi tergep-tekserýdiń biryńǵaı tizilimine engizilgen. Qylmystyq is boıynsha aıyptalýshylar ýaqytsha qamaýda otyr. 200-ge jýyq qylmys anyqtaldy, jalpy shyǵyn kólemi shamamen 15 mln teńgeni quraıdy», - dep habarlady PD baspasóz qyzmeti.

2022 jyldyń basynan beri Pavlodar oblysynda 482 ınternet-alaıaqtyq faktisi tirkelgen.