Tanymal týyndy keıipkeri Astanaǵa keldi
ASTANA. QazAqparat - Keńestik jýrnaldar men mektep oqýlyqtaryna kóptep basylǵan, sýretshi Tatıana ıAblonskaıanyń «Tańerteń» týyndysynyń keıipkeri Elena Beısembınova Astanaǵa keldi, dep habarlaıdy QazAqparat tilshisi.
Kartınanyń Qazaqstanmen baılanysty ózindik tarıhy bar. 13 jastaǵy Lenanyń beınesine ǵashyq bolǵan almatylyq qazaq Arsen Beısembınov týyndyny óz bólmesine ilip qoıǵan. Arsen er jetip, Máskeýdegi Stroganov ýchılışesine túsken jáne sol ýchılışede Elenamen tanysqan. Osylaısha, Arsen Beısembınov bala kezden ǵashyq bolǵan Lenaǵa úılengen.
«Munda meniń bólmem, meniń tósegim beınelengen. Ondaǵy kóterińki kóńil-kúıdi anam jetkize aldy dep oılaımyn. Balkonda ózim ósirgen ósimdikter tur. Bıolog bolýdy armandaǵan edim, anamnyń jolyn qýyp, beıneleý ónerin tańdadym. Áıtse de, tabıǵat taqyrybyna adal bolyp qaldym. Peızaj, gúlder, kóbelekterdi kóp salamyn. Bizdiń páter Kıevtiń ortalyǵynda 7-qabatta ornalasqan. Keń kósheler, júrginshilerdiń, kóliktiń shýy - bári-bári esimde. Qazir onda ózge qojaıyndar turyp jatyr, sońǵy ret 2003 jyly bardym», - dep eske aldy Elena Beısembınova QR Ulttyq mýzeıinde jýrnalısterge bergen suhbatynda.
Elena mektepti aıaqtaǵan soń, Máskeýge Stroganov ýchılışesine oqýǵa túsken jáne kýrstasymen Almatyǵa qydyryp barǵan.
«Arsenmen tanystyǵyma 1 jyl bolǵanda, Almatyǵa qonaqqa keldim. Qarasań kóz toımaıtyn ásem Almaty birden baýrap aldy. Arsenniń bólmesine kirgenimde óz beınemdi kórdim. Arsen de ózi ǵashyq bolǵan qyzben birge oqyǵanyn bilmegen eken. Qatty tańǵaldy. Arsenmen shańyraq kóterip, Almatyda turdyq. Óz mamandyǵymyzben jumys istedik», - dedi Elena Beısembınova.
Qazir Elena Almaty qalasynda turady. Arsen 2000 jyly dúnıeden ozǵan. Olardyń Zańǵar esimdi uly bar.
Aıta keteıik, Astananyń 20 jyldyq mereıtoıy aıasynda QR Ulttyq mýzeıinde «Tretıakov galereıasy toptamasynan HH ǵasyrdyń 50 jaýhary» atty kórme ashyldy. Máskeýden jetkizilgen 50 kórkem sýret týyndynyń aldy 1900 jyldary, sońǵylary - 1980 jyldary salynǵan. Ekspozıtsııaǵa Abram Arhıpovtyń «Sharýa áıel», Konstantın Korovınniń «Baýda. Gýrzýf», Arkadıı Rylovtyń «Jasyl shý», Ilıa Mashkovtyń «Máskeý azyq-túligi: nan», Fedor Reshetnıkovtyń «Taǵy da ekilik», Tatıana ıAblonskaıanyń «Tańerteń», ıÝrıı Pımenovtyń «Bolashaq kóshedegi toı» syndy áıgili eńbekteri kirgen.
«Astanaǵa ne aparamyz degende, ortaq zamandy eske túsiretin orys kórkemóner mektebiniń jetistikterin kórsetetin týyndylardy tańdaýdy uıǵardyq. Kelýshilerge jarqyn ári kóńildi áser syılaıtyn kórmeni qoıýǵa tyrystyq», - dedi RF Memlekettik Tretıakov galereıasynyń Bas dırektory Zelfıra Tregýlova kórmeniń ashylý saltanatynda.
Kórme 2018 jyldyń 10 qyrkúıegine deıin jalǵasady.
