Tanymal tulǵalar Túrkistandaǵy HQO-da turǵyndarǵa qyzmet kórsetti
ShYMKENT. QazAqparat - Búgin «Azamattarǵa arnalǵan úkimettiń» Túrkistan oblystyq fılıalynda «Juldyzdyń HQO-daǵy bir kúni» respýblıkalyq aktsııasy ótti. Sharaǵa elimizge tanymal tulǵalar qatysyp, halyqqa qyzmet kórsetti, dep habarlaıdy QazAqparat tilshisi.
Aktsııa aıasynda áıgili ázilkesh, «Nysana» teatrynyń eks-akteri, «Erekshe shoý» tele-jobasynyń basshysy Dáneker Orazbaı men bokstan álem chempıony, halyqaralyq dárejedegi sport sheberi Dına Islambekova, onyń jeke jattyqtyrýshysy Almas Qýatbekov Halyqqa qyzmet kórsetý ortalyǵynda «Tsıfrlyq Qazaqstan» baǵdarlamasynyń elektrondy qyzmetterin nasıhattady. Olardy kórgen turǵyndar alǵashynda tańyrqap, tosyrqap qaldy. Artynsha ataqty jerlesterine qurmet kórsetip, keńesterin aldy. Qazaqstan sportynyń maqtanyshy, kókireginde altyn medali jarqyraǵan chempıon Dına óz jattyqtyrýshysymen birge halyqqa sypaıy jáne sabyrly kúıde keńes berip, elektrondyq úkimet portalynyń múmkindikterin túsindirdi. Al shoýmen Dáneker Orazbaı azamattarǵa elektrondyq kezek talonyn taratsa, «Shanshar» ázil-syqaq teratrynyń aktery Ǵalymjan Qalybaı halyqty «Ózine-ózi qyzmet kórsetý sektoryna» baǵyttap otyrdy.
Ázilderimen áıgili bolǵan jigitter búgin ádetten tys resmı kostıýmde, salmaqty túrde halyqqa memlekettik qyzmetterdi úıden shyqpaı-aq nemese kóshede kele jatyp-aq uıaly telefondary arqyly alýǵa bolatynyn aıtty. Arasynda qaljyńdap, azamattardyń kóńilderin kóterýge tyrysty.
«Mine, oblysymyzdyń juldyzdary bizdiń usynysymyzdy birden qabyldap, turǵyndarǵa qyzmet kórsetýge qýana kelisti. Olardy halyq qurmetteıdi jáne elektrondyq qyzmet alý týraly keńesterine qulaq asady degen úmittemin. Elimizdiń bolashaǵy jastar qolynda, sondyqtan biz aktsııaǵa jas talanttarymyzdy shaqyrdyq»,- deıdi Túrkistan oblystyq fılıaly dırektorynyń orynbasary Mádı Amanjol.
Halyqqa keńestik qyzmet kórsetken «juldyzdy mamandar» sharshasa da, búgingi jumys kúnderine dán rıza bolysty.
«Bul bólimdegi jumys ta bokstaǵydaı kúsh-qaıratty, temirdeı tózimdilik pen únemi damýdy talap etedi eken», - dedi Dına Islambekova.
Aıta keteıik, «Azamattarǵa arnalǵan úkimet» memlekettik korporatsııasynyń Túrkistan oblystyq fılıaly 2018 jylǵy 1 qazanda qurylǵan bolatyn. Qazirgi tańda fılıal quramyndaǵy 25 front-ofıs pen 34 bek-ofıst bar. Onda eńbektenip jatqan myńnan astam maman halyqqa aptasyna altyn kún tańǵy saǵat 9.00-den keshki saǵat 20:00-ge deıin úzilissiz qyzmet kórsetedi.
