Tanymal tórt aıtys aqyny kópbalaly otbasyǵa úı syılady
TALDYQORǴAN. QazAqparat - Taldyqorǵanda «Uly dala án men jyry, aqyndardyń jeti qyry» atty aıtys aqyndarynyń jańa avtorlyq jobasy usynyldy. Aınur Tursynbaeva, Balǵynbek Imash, Sara Toqtamysova men Jandarbek Bulǵaqovtyń án-jyr keshinde kópbalaly otbasyǵa úıdiń kilti tabys etildi, dep habarlaıdy QazAqparat tilshisi.
Aıtys óneriniń tórinde júrgen tórt aqyn Qazaqstan boıynsha gastroldik saparǵa shyqty. Alǵashqy kontsertin Taldyqorǵannan bastady. Sebebi Balǵynbek pen Jandarbek - Jetisý óńirinde týyp ósken aqyndar. Al keshtiń 25 sáýirde ótýiniń ózindik syry bar. Eki aqyn da dál osy kúni dúnıe esigin ashqan. Jetisýdyń qos qyranyna Shyǵystyń qos shynary Aınur men Sara qosylyp, talǵampaz kórermenge keremet kesh syılady. Aqyndardyń sýyryp salma ónerinen bólek basqa da qyrlaryn tanytty. Tebirenip qara óleń oqydy, áýeletip án shyrqady. Salt dástúrden sarqyt dep qyz uzatty, kelinniń betin ashty. Qasıetti ramazan aıy qarsańynda qaıyrymdy is bastap, kontsertten túsken qarjyǵa kópbalaly otbasyǵa baspana áperdi. 5 balasymen 10 jyldan astam ýaqyt páter jaǵalap júrgen Erkin Táńirbergenovke úıdiń kiltin Aınur Tursynbaeva men Balǵynbek Imash tabystady. Jumys ornynan berilgen bıletpen kontsertke kelgen Erkin úshin de, qazaqtyń tól ónerinen sýsyndaǵan jetisýlyqtar úshin de bul tosyn syı boldy. Aqyndar bul ıgi bastama ózgelerge úlgi bolyp, osyndaı halyq sanyn kóbeıtip otyrǵan otbasylarǵa qoldaý bildirsin degen nıetpen qolǵa alǵandaryn aıtty.
Tórt aqyn aldaǵy ýaqytta gastrolmen búkil qazaq dalasyn aralap shyǵýdy josparlap otyr. Taldyqorǵannan keıin Balǵynbek Imash sahnadaǵy 25 jyldyǵyn 1 mamyrda Almatyda atap ótedi. Al Ertistiń erke qyzdary Aınur Tursynbaeva men Sara Toqtamysova 3, 4 mamyrda týǵan jerleri Semeı men Óskemende jerlesterimen qaýyshady.
