Tanymal tıktoker Tekeli mańyndaǵy taýlarda joǵalyp ketti

ALMATY. QazAqparat - Jetisý oblysy taýlarynda habar-osharsyz ketken tıktoker izdestirilip jatyr, dep habarlaıdy QazAqparat polıtsııaǵa silteme jasap.

36 jastaǵy almatylyq Damır Kýsheev Tekeli mańyndaǵy taýda habar-osharsyz joǵalyp ketti.

7 maýsym Qora shatqalyndaǵy Burqanbulaq sarqyramasyna sport velosıpedimen baryp, bógettiń janynda turyp sońǵy márte efırge shyqqan, sol jerde jergilikti qoryqshynyń qolynan sháı iship, dám aýyz tıgen.

Baılanys úzilgennen keıin Kýsheevtiń jubaıy tótenshe jaǵdaılar departamentine júgingen.

Aryzdy Eskeldi aýdanynyń polıtseıleri de tirkep, jedel izdestirý sharalaryna kiristi.

Qazir taýly aımaqta polıtseıler men TJD qyzmetkerleri, kınologtar joǵalǵan jigitti izdestirip jatyr.

Damır Kýsheev túrli kórikti jerlerge velosıpedpen barǵandy unatady. TikTok jelisinde óziniń jeke paraqshasy bar. Eskeldi aýdanyndaǵy týystarynda qonaqta bolǵan.

Joǵalǵan adamnyń júrgen jeri týraly aqparaty bar kez kelgen adam myna telefondarǵa habarlasa alady: 8 747 558 1508, 708 252 2008, 102 nemese 112.